Mat 1:0 huet Örebro an der 2. Liga s Schweden géint Eskilstuna gewonnen.

An der 2. Liga a Schweden huet Örebro duerch e Gol vum Vincent Thill gewonnen. An der 48. Minutt huet de Lëtzebuerger zum 1:0 géint Eskilstuna getraff. Aktuell steet Örebro op der 5. Tabelleplaz.

De Lars Gerson huet mat Kongsvinger eng Néierlag kasséiert. E Méindeg huet d'Ekipp an der 2. Liga an Norwegen mat 0:1 zu Oslo de Kierzere gezunn. De Lëtzebuerger Nationalspiller gouf an der 60. Minutt agewiesselt.

Sonndeg

Um Sonndeg stoung den zweetleschte Spilldag vun der Ofstigsgrupp an der 2. Liga an Dänemark um Programm. Hei ass Jammerbugt op Fremad Amager getraff. De Leonel Gomes, Farid Ikene an Diogo Pimentel stoungen an der Startopstellung an den Omar Natami gouf an der Paus agewiesselt. Et war dann och de lescht genannten deen an der 93. Minutt den 3:2 fir Jammerbugt schéisse konnt. De Farid Ikene gouf schonn an der 16. an de Leonel Gomes an der Paus ausgewiesselt. Dës 3:2-Victoire kann awer net méi den Ofstig an déi 3. Liga verhënneren.

An der Belsch verléiert den Anthony Moris mat Royal Union Saint-Gilloise um leschte Spilldag mat 0:1 géint Royal Antwerpen a schléisst d'Saison domadder als 2. of. De Lëtzebuerger Nationalgolkipper stoung de ganze Match iwwer um Terrain.

Samschdeg

A Moldawien huet Sheriff Tiraspol duerch ee Gol an der Nospillzäit géint Sf.Gheorghe d’Coupe gewonnen a kann domat den Doublé feieren. De Sébastien Thill op Säite vun Tiraspol souz déi 90 Minutten iwwer op der Bänk.

An der Slowakei huet sech Sered mam Edin Osmanovic um leschte Spilldag vum Titel-Playoff misse mat 1:3 beim MFK Ruzomberok geschloe ginn. De Lëtzebuerger krut an der 56. Minutt déi rout Kaart gewisen, do louch seng Ekipp allerdéngs schonn 1:3 zréck. Trotz dëser Néierlag huet Sered als 5. eng Plaz am Playoff vun der Qualifikatioun fir d’Conference League.

An Éisträich gouf et um leschte Spilldag vum Titel-Playoff vun der 1. Liga eng wichteg 4:2-Victoire fir Austria Wien géint Sturm Graz. De Marvin Martins stoung de ganze Match iwwer um Terrain an huet mat dozou bäigedroen, dass seng Ekipp 3. am Championnat bleift an domat an d’Qualifikatioun fir d’Europa League komm ass.

Freideg

An der 2. tierkescher Liga huet Eyüpspor auswäerts mat 3:0 géint Balikesirspor gewonnen a sech eng Plaz am Playoff geséchert. Domadder spillt een nach ëm den Opstig an d'Süper Lig. Bei Eyüpspor stoungen e Freideg den Owend weder de Gerson Rodrigues nach den Olivier Thill am Kader.

Op Zypern huet Achnas um leschte Spilldag mat 1:2 géint AEL Limassol verluer. Scho virum Match stoung Achnas als Ofsteiger fest. Den Tim Hall stoung bei Achnas net am Kader.