An engem dramatesche leschte Spilldag séchert sech ManCity an England de Championstitel viru Liverpool nodeems se scho mat 0:2 am Réckstand louchen.

An England hu Manchester City a Liverpool et ganz spannend gemaach an der Lutte ëm de Championstitel. Virum leschte Spilldag louch Manchester City mat 1 Punkt virun de Reds. Béid Ekippen hate mat Aston Villa an Wolverhampton Wanderers keng all ze schwéier Géigner mee béid Ekippen hu sech awer schwéier gedoen. No den éischte 45 Minutten louch Manchester City iwwerraschend mat 0:1 géint Aston Villa, mam Trainer Steven Gerrard, am Réckstand a bei Liverpool stoung et just 1:1 géint Wolverhampton. No der Paus ass ManCity souguer mat 0:2 a Réckstand geroden mee hunn dunn awer opgedréint an de Match innerhalb vu 5 Minutten op en 3:2 gedréint. Domadder war den 2:1 vum Salah an 3:1 vum Robertson fir Liverpool net méi vu Bedeitung a Manchester City séchert sech domadder säin 8. Championstitel no 1937, 1968, 2012, 2014, 2018, 2019 an 2021.

Fir d'Champions League hu sech domadder Manchester City, Liverpool, Chelsea London an Tottenham qualifizéiert. Arsenal London a Manchester United trieden an der Europa League un a West Ham United spillt an der Conference League. Erof an d'Championship falen Burnley, Watford an Norwich.

An Italien war d'Spannung virum leschte Spilldag genau sou grouss wéi an England, well hei louchen den AC Mailand an Inter Mailand just 2 Punkten auserneen. Den AC Mailand wollt awer schlussendlech net sou vill Spannung opkomme loossen a louch schonn no der éischter Hallschent duerch Goler vum Giroud (2x) an dem Kessie mat 3:0 a Féierung. No der Paus huet Milan den Tempo erausgeholl an den 3:0 souverän bis zum Schluss gehalen. Am Parallelmatch huet Inter Mailand no der Paus zwar och 3 Goler géint Sampdoria Genua geschoss mee dës hate keen Afloss méi op den Ausgang vun der Meeschterschaft. Domadder gewënnt den AC Mailand fir déi 19. Kéier de Championstitel an der Serie A nodeems se e fir d'lescht 2011 gewonnen haten.

Inter Mailand séchert sech hannert dem AC Mailand déi 2. Plaz virun Neapel a Juventus Turin. Domadder sinn dës 4 Ekippe fir d'Champions League qualifizéiert. Lazio Roum spillt an der Europa League an AS Roum an der Conference League.