Donieft huet an der Tierkei Eyüpspor mam Olivier Thill an dem Gerson Rodrigues den Allersmatch vun de Playoff-Halleffinalle gewonnen.

An den USA steet den New York City FC mam Maxime Chanot an de Véierelsfinalle vum US Open Cup. An der Nuecht op en Donneschdeg eiser Zäit huet ee sech no Verlängerung mat 1:0 géint New England Revolution duerchgesat. De Lëtzebuerger stoung de ganze Match um Terrain.

Mëttwoch

An der Tierkei dierf Eyüpspor weider vum Opstig an d'Süper Lig. D'Ekipp mat den zwee Lëtzebuerger Nationalspiller Olivier Thill a Gerson Rodrigues huet e Mëttwoch den Owend den Allersmatch vun de Playoff-Halleffinalle mat 1:0 géint Bandirmaspor gewonnen.

Den Thill gouf an der 40. Minutt ausgewiesselt an de Gerson Rodrigues krut an der 17. déi giel Kaart a gouf an der 69. Minutt ausgewiesselt. De Retourmatch ass e Sonndeg um 14.30 Auer eiser Zäit.

Achnas huet sech an der Finall vun der Coupe missen am Eelefmeterschéisse mat 4:5 Omonia Nikosia (vun der 5. Minutt un an Ënnerzuel) geschloe ginn. No 90 Minutten an der Verlängerung stoung et 0:0.

Den Tim Hall souz bei Achnas de ganze Match op der Bänk.