Op der Marathon-Distanz ka sech bei den Dammen d'Mercy Tuitoek duerchsetzen a beim Semi-Marathon gëtt et eng Victoire vum Jenny Gloden.

De Marathon gouf gewonnen vum Kenianer Ezekiel Kiprop Koech an enger Zäit vun 2:15:46 Stonnen an hat domadder eng Avance vu 15:57 Minutten op säi Landsmann Gedion Kipchirchir Murrei. Drëtte gëtt de Marokkaner Alaa Hrioued. Hien hat e Retard vun 19:30 Minutten.

Réckbléck ING Nuetsmarathon/Reportage Franky Hippert
RTL

© Jana Peters

Beschte Lëtzebuerger gëtt de Bertil Muller an enger Zäit vun 2:43:40 Stonnen.

Bei den Damme sëtzt sech d'Kenianerin Mercy Jeptoo Tuitoek an enger Zäit vun 2:43:31 Stonnen duerch. Mat engem Retard vun 1:38 Minutten koum mam Shauline Chepkirui Koech eng weider Kenianerin als 2. op d'Arrivée. De Podium gëtt komplettéiert vum Kerry Price an enger Zäit vun 2:58:29 Stonnen.

Bescht Lëtzebuergerin gëtt d'Shefi Xhaferaj als 4. an enger Zäit vun 3:07:11 Stonnen.

RTL

© Jana Peters

Beim Semi-Marathon huet de Spuenier Eric Domingo Rolden an enger Zäit vun 1:12:14 Stonne gewonnen. Hien hat eng Avance vun 3 Sekonnen op de Fransous Kamel Daouadji. De Belsch Justin Mahieu hat als Drëtten e Réckstand vu 14 Sekonnen.

Beschte Lëtzebuerger war de Luc Scheller als 5.. Fir hien ass de Chrono no 1:14:11 stoe bliwwen.

Bei den Damme gouf et eng Victoire fir d’Lëtzebuergerin Jenny Gloden, dat an enger Zäit vun 1:20:26. D’Anny Wolter ass déi Zweet gi mat engem Retard vun 2 Minutten an 12 Sekonnen. Um Podium stoung nach d’Charlotte Sujardin aus der Belsch (1:29:14).

Insgesamt gounge bei der 15. Editioun ronn 12.000 Leefer aus 43 Länner un den Depart. Anescht wéi an den anere Jore waren dëst Joer, opgrond vun oppene Froen zu de Covid-Mesuren, keng international Top-Athleten um Depart.

Ezekiel Koech huet mat groussem Virsprong gewonnen.