An Dänemark sinn um Samschdeg de Sead Korac an Diogo Pimentel mat Jammerbugt an déi 3. Divisioun gefall.

Um Sonndeg war et kee gudden Dag fir d'Lëtzebuerger Futtballer am Ausland.

Huddersfield huet an der Finall ëm den Opstig an d'Premier League mat 0:1 géint Nottingham Forrest verluer. Am legendäre Wembley-Stadion stoung den Danel Sinani vun Ufank un um Terrain, gouf awer an der 66. Minutt ausgewiesselt. Wéi et fir de Nationalspiller weidergeet, steet nach net fest. Hie war fir dës Saison vu Norwich op Huddesrfield ausgeléint ginn. Mat Lëtzebuerg wäert hien awer vum nächste Samschdeg un d‘Nations League spillen.

An der Tierkei huet Eyüpspor et verpasst an d'Finall ëm den Opstig an d'Süper Lig ze kommen. Nodeems een den Allersmatch nach 1:0 gewonnen hat, gouf et am Réckmatch eng 0:3-Defaite. De Gerson Rodrigues stoung an der Startformatioun an huet de Match duerchgespillt. Den Olivier Thill hat sech am 1. Match um Kräizband a Meniskus blesséiert. Hie koum de Weekend fir Analysen op Lëtzebuerg a riskéiert, fir eng länger Zäit auszefalen.

De Vincent Thill huet an der 2. schwedescher Liga mat Örebrö 0:2 géint Brommapojkarna verluer. De Lëtzebuerger  gouf an der 67. Minutt ausgewiesselt.

An der Nuecht huet New York City en 1:0-Succès bei Minnesota United gefeiert. De Maxime Chanot stoung net am Kader.

Samschdeg

An der 2. Divisioun an Dänemark ass Esbjerg mam Sead Korac am leschte Match vun der Saison op Jammerbugt mam Diogo Pimentel getraff. Déi 2 Ekippe stounge scho virdrun als Ofsteiger an déi 3. Divisioun fest. Um Enn trenne sech déi zwou Ekippen mat engem 2:2. Bei Esbjerg stoung de Sead Korac de ganze Match iwwer um Terrain a krut an der 58. Minutt eng giel Kaart. Bei Jammerbugt gouf den Diogo Pimentel an der 72. Minutt ausgewiesselt. De Farid Ikene, Omar Natami, Yan Bouché a Leonel Gomes stounge bei Jammerbugt net am Kader.