D'Lëtzebuerger Ausnamespillerin verléiert an der 2. Ronn vun der Qualifikatioun géint d'Australierin Maddison Inglis a seet der Tenniswelt domadder Äddi.

Mat 6:7 (3:7), 6:3 an 2:6 huet d'Mandy Minella sech an hirem leschte Match als Tennisprofi misse geschloe ginn.

Fir déi 36 Joer al Lëtzebuergerin geet domadder eng laang Karriär op en Enn. 2016 hat si zu Bol a Kroatien hiren éischten an eenzege WTA-Titel am Eenzel gewonnen. Bei engem Grand Slam koum si 2010 an 2012 bis an den drëtten Tour.

Déi 66. Plaz an der Weltranglëscht 2012 war hie beschte Ranking.

Am Dubbel huet si 10 ITF- a 5 WTA-Titele gewonnen.

Dem Lëtzebuerger Public hat d'Mandy Minella schonn op der Kockelscheier beim leschten Dammentennis-Tournoi op emotional Aart a Weis Äddi gesot.