Den AIK huet mat 0:1 de Kierzere gezunn a misst ouni Punkt zréck op Stockholm. Och fir de Maxime Chanot gouf et an der MLS kee Punkt ze huelen.

Sonndeg

An der US-amerikanescher MLS gouf et fir den amtéierende Champion New York City FC eng 2:3-Defaite géint d'Columbus Crew. De Maxime Chanot gouf beim Punktverloscht an der Nuecht vun de Samschdeg op e Sonndeg an der 73. Minutt agewiesselt.

Fir de Vincent Thill gouf et an der schwedescher Allsvenskan en Debut ouni Succès. Den AIK huet sech am Match géint de Kalmar FF mat 0:1 misse geschloe ginn. De Lëtzebuerger Nationalspiller stoung dobäi an der Starteelef a war duerno fir 79 Minutten am Asaz.

Um 1. Spildag vun der zweeter portugiesescher Liga huet sech den Eric Veiga misse mat Vilafranquense geschloe ginn. De Match géint Moreirense huet een duerch en Eelefmeter an der 19. Minutt mat 1:0 verluer.

Och fir de Marvin Martins gouf et e Sonndeg keng Punkte mat Austria Wien. Bei der 2:3-Defaite géint den SCR Altach war de Lëtzebuerger fir 88 Minutten am Asaz.

An der 1. Bundesliga konnt sech den 1. FC Köln mat 3:1 géint Schalke behaapten. De Mathias Olesen koum fënnef Minutte viru Schluss op den Terrain a konnt d'Féierung duerno sécher iwwert d'Zäit bréngen.

Samschdeg

Um Samschdeg war et fir Norwich City an den Danel Sinani den zweete Match vun der Saison. No der 0:1-Defaite zum Optakt gouf et um zweete Spilldag en 1:1-Gläichspill fir d'Canaries. De Lëtzebuerger Nationalspiller huet de Gros vum Match vun der Bänk aus gesinn a gouf an der 77. Minutt agewiesselt.

An der Bundesliga waren zwee Lëtzebuerger am Asaz. Bei der 3:1-Heemvictoire vu Gladbach géint Hoffenheim souz den Yvandro Borges 90 Minutten op der Bänk.

De Leandro Barreiro war mat Mainz zu Bochum op Besuch an huet déi éischt 60 Minutte vun der Bänk aus gesinn, éier hien agewiesselt gouf. Kuerz no senger Awiesslung ass den 2:1 fir seng Faarwe gefall, sou dass Mainz mat enger Victoire an déi nei Saison start.

An der 2. däitscher Bundesliga huet Hansa Rostock sech mam Sébastien Thill an der Startformatioun mat 2:1 géint Arminia Bielefeld behaapt. Den Thill gouf eréischt an der 90. Minutt ausgewiesselt. Fir hie war et säin éischte Match no senger Blessur.

An der Belsch huet den Anthony Moris mat Royale Union Saint-Gilloise de Kierzere gezunn. Zu Malines krut de Lëtzebuerger Golkipp 3 Goler erageschoss. No der staarker leschter Saison war de Start an déi nei Saison fir Saint-Gilloise duerchwuess. An dräi Matcher gouf et ee Remis, eng Victoire an eng Néierlag.

Freideg

An Holland war dëse Freideg den Optakt an déi nei Saison. An der Eredivise stoung da mam Mica Pinto an der Ekipp vu Sparta Rotterdam och e Lëtzebuerger Nationalspiller vun Ufank u mat um Terrain. Rotterdam huet Auswäerts musse géint Heerenveen untrieden. Net am Kader vu Rotterdam war de Laurent Jans.

An der 1. Hallschent hat Rotterdam e bësse méi vum Spill, dat bei 54% Ballbesëtz. Si konnten dorausser awer kee Profit zéien an et goung mat 0:0 an d'Kabinn. An der 2. Hallschent war de Match zimmlech ausgeglach, ma keng vu béiden Ekippe konnt sech um 1. Spilldag 3 Punkte sécheren. Mat engem 0:0 huet ee sech getrennt.

An der Eerste Divisie huet Heracles géint Den Haag mam Dirk Carlson gespillt. Heracles hat e richteg gudde Start an de Match, well no just 4 Minutte gounge si duerch de Marko Vejinovic mat 1:0 a Féierung. Den Haag huet kee Fouss op de Buedem kritt an Heracles huet bei 5 Schëss op de Gol 4 mol getraff. Den 2:0 an den 3:0 geet zu Gonschte vum Samuel Armenteros an der 22. an 34. Minutt. An der 44. Minutt huet den Nikolai Laursen de 4:0 geschoss. Mat deem Score goung et an d'Paus.

An der 2. Hallschent war d'Loft e bëssen eraus. Heracles huet de Match geréiert an et ass um Enn bei enger verdéngter 4:0-Victoire bliwwen.