Den Henx ass iwwer 50 Meter Papillon dee 25. ginn a fir d'Olivier war et iwwer 100 Meter Crawl déi 32. Plaz.

En Donneschdeg huet zu Roum an Italien d'Europameeschterschaft am Schwammen ugefaangen. Mam Julien Henx a Monique Olivier waren zwee Lëtzebuerger um 1. Dag am Asaz.

Iwwer 50 Meter Papillon ass de Chrono fir den Henx an de Virleef no 23 Sekonnen a 95 Honnertstel stoe bliwwen. Domadder bleift de Lëtzebuerger 40 Honnertstel iwwert sengem nationale Rekord aus dem Abrëll 2022. Hie gëtt um Enn de 25. ënner 57 Schwëmmer a verpasst d'Halleffinallen.

D'Monique Olivier war iwwer 100 Meter Crawl am Asaz. Déi 22 Joer al Schwëmmerin huet no 57 Sekonnen a 84 Honnertstel ugeschloen an ass mat dëser Zäit déi 32. ënner 36 Starterinne ginn. Och si huet sech domadder net fir d'Halleffinalle qualifizéiert.