Den Dirk Carlson an de Maxime Chanot verléiere mat hiren Ekippen. Vilafraquense kritt déi éischt dräi Punkten a Sparta Rotterdam verléiert trotz Féierung.

An den USA d'Ekipp vum Maxime Chanot an der Nuecht op e Sonndeg mat 2:3 beim Auswäertsmatch zu Miami verluer. Inter Miami, de neigegrënnte Klub vum eemolege Starspiller David Beckham, hat um Enn dat gréissert Gléck a konnt sech zweemol no engem Réckstand zeréckkämpfen an an de leschte Minutte vum Match nach den decisive Gol schéissen. De Maxime Chanot stoung 90 Minutten um Terrain a krut wéinst engem ze haarden Tackling déi Giel Kaart gewisen.

An der Eerste Divisie an Holland huet ADO Den Haag och den zweete Match vun der Saison verluer. D'Ekipp vum Trainer Dirk Kuyt, eemolegen hollänneschen Nationalspiller, huet mat 0:2 de Kierzere gezunn. Den Dirk Carlson stoung an der éischter Hallschent um Terrain, gouf awer an der Paus ausgewiesselt.

An der Eredivisie huet Sparta Rotterdam déi éischt Victoire an der Saison verpasst. D'Ekipp vum Mica Pinto war schonn no 8 Sekonnen a Féierung gaangen - wat neie Rekord an der Eredivisie ass-, krut dunn awer zwee Goler geschoss. Rotterdam konnt zwar nach eng Kéier ausgläichen, mee Alkmaar huet e weidere Gol geschoss, sou dass si um Enn mat 3:2 bei Sparta gewannen. De Mica Pinto huet 90 Minutten duerchgespillt, de Laurent Jans stoung wéinst enger Blessur net am Kader.

AIK Stockholm séchert sech mam Vincent Thill an der Startformatioun ee Punkt géint Värnamo. Kuerz nom 2:2 huet de Lëtzebuerger Nationalspiller eng Giel Kaart kasséiert. No 18 Matcher steet Stockholm mat 32 Punkten op der fënnefter Plaz an der Tabell, fënnef Punkten hannert dem Éischtplacéierten Djurgardens.

De Leandro Barreiro a Mainz kommen net iwwer en 0:0 géint Union Berlin eraus. De Lëtzebuerger souz déi éischt 45 Minutten op der Bänk a gouf an der 65. Minutt agewiesselt. Duerno hat Mainz zwar méi kloer Golchancen, mee konnt keng dovun notzen.

An der zweeter portugisescher Liga hunn den Eric Veiga a Vilafranquense déi éischt dräi Punkte vun der Saison agefuer. D'Ekipp aus der Géigend vu Lissabon huet Oliveirense mat 2:1 geklappt. De Lëtzebuerger stoung an der Startformatioun a gouf an der 65. Minutt ausgewiesselt.

A Bulgarien huet ZSKA Sofia am fënnefte Match déi véiert Victoire gefeiert. De Veräi vum Enes Mahmutovic huet sech am Stadderby géint Septemvri Sofia mat 1:0 behaapt a steet elo op der zweeter Tabelleplaz. De Lëtzebuerger stoung 90 Minutten um Terrain.

Samschdeg

De Marvin Martins setzt sech am éisträichesche Championnat mat senger Ekipp Austria Wien géint WSG Tirol mat 2:1 duerch. De Lëtzebuerger Nationalspiller stoung an der Startformatioun an huet 90 Minutten duerchgespillt. Et war eng wichteg Victoire fir Austria Wien, well een domat déi lescht Plaz an der Tabell verloosse kann.

Fir den Danel Sinani an Norwich City wëll et dës Saison net esou rullen. D'Canaries verléiere verdéngt mat 1:2 am Auswäertsmatch géint Hull City. De Lëtzebuerger koum wärend den 90 Minutten net an den Asaz. Norwich bleift mat just engem Punkt no dräi Spilldeeg op der leschter Plaz an der englescher Championship.

An der Bundesliga war de Mathias Olesen mat Köln zu Gaascht bei RB Leipzig. Beim 2:2-Gläichspill stoung de Lëtzebuerger zwar am Kader, mee souz 90 Minutten op der Bänk.

Am Owesmatch vun der däitscher Bundesliga war den Yvandro Borges mat Gladbach bei Schalke op Besuch. De Lëtzebuerger koum bei der 2:1-Victoire awer net an den Asaz.

An der 2. Bundesliga hat Hansa Rostock mam Sébastien Thill keng Chance géint Darmstadt. No 90 Minutten huet ee kloer mat 0:4 de Kierzere gezunn. An der Paus louchen d'Gäscht mat 0:2 hannen. Dat ënnert anerem duerch e kuriéisen éischte Gol. De Golkipp vu Rostock war schonn an der 3. Minutt net opmierksam an hat sech de Ball vum Tietz stibitze gelooss. Deen huet dat ronnt Lieder dunn ouni Problem an den eidele Filet gesat. An der 64. Minutt gouf de Lëtzebuerger ausgewiesselt.

Den Timothy Martin stoung an der 1. Liga an der Belsch bei der 0:1-Néierlag vu senger Ekipp géint Charleroi nach net um Terrain. De Wiessel vum Lëtzebuerger bei den RFC Seraing war eréischt virun e puer Deeg public gemaach ginn. Seraing steet op der leschter Plaz an der Tabell, dat mat 0 Punkten no 4 Matcher.

Besser ass et an der Belsch fir den Anthony Moris a Royale Union SG gelaf. Mam Lëtzebuerger Nationalspiller am Gol huet ee sech mat 2:1 géint Kortrijk duerchgesat. No 4 Matcher huet ee 7 Punkten um Kont.