Wolz a Stroossen feieren Heemvictoirë géint Rouspert respektiv Déifferdeng. Hesper wënnt mat 4:0 zu Hueschtert an Ettelbréck kritt 3 Punkten zu Monnerech.

Resumé BGL Ligue / Reportage Gilles Tricca

Wolz setzt sech mat 3:1 géint Rouspert duerch. Mat der éischter nennenswäerter Aktioun vum Match ass den 1:0 fir d'Heemekipp gefall, mee Rouspert konnt 10 Minutte méi spéit egaliséieren. Duerno huet sech d'Partie bis zur Paus zu engem Summerkick entwéckelt, och well d'Temperaturen hiren Deel dozou bäigedroen hunn. An der 53. Minutt konnt de Golkipp vu Rouspert en Eelefmeter vum Timmermans paréieren. Wolz hat duerno awer méi vum Spill a konnt dat an der 74. Minutt an e weidere Gol ëmmënzen. Rouspert huet nach eng Kéier probéiert zeréckzekommen, mee et waren déi Wolzer, déi an der 88. Minutt de Sak zougemaach hunn.

Stroossen gewënnt mat 3:2 géint den FC Déifferdeng 03. D'Haushäre louchen duerch zwee perséinlech Feeler vum Déifferdenger Golkipp a vum D'Anzico zur Paus mat 2:1 vir. Nodeems Déifferdeng duerch den Oliveira a Féierung goung, konnt Stroossen quasi am Géigenzuch ausgläichen. 10 Minutten nom 1:1 huet d'Lokalekipp en Eelefmeter zougesprach kritt an deen och verwandelt. An der zweeter Hallschent ass de Match méi ruppeg ginn an et goufe wéineg Golchancë kreéiert. Wéi de Match zu Gonschte vun Déifferdeng um Kippe war, huet den Arbitter e weideren Eelefmeter fir Stroossen ginn, dee vum Bernardelli ganz sécher verwandelt gouf. De Bedouret krut bannent dräi Minutten zwou Giel Kaarte gewisen a goung méi fréi vum Terrain. Trotz Ënnerzuel huet Déifferdeng nach e Gol markéiert, och wann et en Eegegol vu Stroossen war.

De Champion Diddeleng setzt sech mat 3:2 zu Nidderkuer duerch. Am Spëtzematch hu sech béid Ekippen déi éischt 20 Minutten ofgetaascht. De Match gouf duerch e Gol vum Filet fir Nidderkuer lancéiert, deen Diddeleng e puer Minutte méi spéit egaliséiere konnt. Bis zur Paus hu sech béid Formatioune gutt Chancen erausgespillt. Nom Säitewiessel hat Diddeleng en éischte Versuch op de Gol, éier deen zweeten dobanne war. De Magno hat a Kombinatioun mam Hadji markéiert. E puer Minutte méi spéit war et nees eng Koproduktioun vun de selwechten Acteuren, just dass den Hadji markéiert hat. Virun iwwer 1.400 Spectateuren huet de Progrès an der 89. Minutt nach den Uschloss markéiert, mee Diddeleng ass als Gewënner vum Terrain gaangen.

De Swift Hesper geet 4:0 op Hueschtert wannen. Schonn no néng Minutte louch de Ball am Filet vun den Haushären. Duerno war et eng ëmkämpfte Partie, ouni vill Golchancen. An der zweeter Hallschent huet Hesper mat zwee séiere Goler duerch den Delgado an de Prempeh de Match fir sech entscheet. An der Nospillzäit sollt nach de 4:0 falen.

Am Match tëscht der Escher Jeunesse a Käerjeng si keng Goler gefall an esou gouf et een 0:0. Déi éischt 45 Minutte ware villverspriechend, well sech béid Ekippe Golchancen erausgespillt hunn. D'Jeunesse hat hei awer déi besser Golméiglechkeete mat zwee Lateschëss. Nom Säitewiessel hu béid Ekippen net méi zum Spill aus der éischter Hallschent fonnt an déi knapp 1000 Spectateuren hu wéineg Interessantes ze gesi kritt. Eréischt kuerz viru Schluss haten déi Escher nach eng Kéier zwou Golchancen, mee de Lucky Punch sollt hinnen net glécken.

RTL

© Christophe Mersch

De Match tëscht dem FC Monnerech an der Ettelbrécker Etzella ass eréischt um 19.30 Auer ugepaff ginn. Monnerech hat an der 1. Hallschent kloer d'Uewerhand an ass no engem schéinen Ugrëff an der 26. Minutt duerch den M'Barki mat 1:0 a Féierung gaangen. Ausser engem Kappball op de Potto hat Ettelbréck an der 1. Hallschent net vill opweises. No der Paus koum d'Etzella besser an de Match a konnt an der 60. Minutt duerch de Kyereh den 1:1 markéieren. Nëmmen 8 Minutten drop hätt Monnerech eigentlech mussen den 2:1 schéissen, ma den M'Barki hat d'Nerve virum Galea verluer. Béid Ekippen hu sech duerno Chancen erausgespillt, mat liichten Avantagë fir Monnerech, virun allem an der leschter Véierelsstonn. An der 88. Minutt haten déi Monnerecher eng 100%eg fir den 2:1, ma de Ball vum Amadei goung iwwert de Gol. Quasi aus dem Näischt ass an der 95. Minutt dunn den 2:1 fir Ettelbréck gefall, dat no engem Fräistouss vu lénks. De Kyereh stoung goldrichteg a konnt aus kuerzer Distanz mam Kapp markéieren. Schlussresultat zu Monnerech deemno 1:2.

RTL

© Bob Leven

D'Resultater am Iwwerbléck (Replay an Ticker)

D'Tabell