Net esou gutt gelaf ass et fir de Bob Bertemes am Bommstoussen an de Charel Grethen iwwer 1500 Meter.

E Méindeg de Moien huet sech d'Patrizia van der Weken iwwer 100 Meter fir d'Halleffinalle qualifizéiert. Déi 22 Joer al Lëtzebuergerin ass am 1. Virlag mat enger Zäit vun 11 Sekonnen a 46 Honnertstel déi 4. ginn an huet sech domadder direkt fir déi nächst Ronn qualifizéiert. Dës gëtt en Dënschdeg den Owend no 20.30 Auer gelaf.

Iwwer 1500 Meter huet de Charel Grethen d'Finall verpasst. De Lëtzebuerger ass am 1. Virlaf mat enger Zäit vun 3 Minutten, 40 Sekonnen an 33 Honnertstel dee 7. ginn. Dat ass um Enn net duergaangen, fir et an déi nächst Ronn ze packen, well deen zweete Virlaf méi séier war. Um Enn ass et déi 16. Plaz ënner 28 Leefer.

Fir d'Finall wier eng Zäit vun 3 Minutten, 39 Sekonnen an 30 Honnertstel néideg gewiescht.

De Bob Bertemes huet am Bommstoussen d'Finall verpasst. De Lëtzebuerger huet d'Bomm an der Qualifikatioun a sengem beschte Versuch 19 Meter a 77 Zentimeter wäit gestouss, dat ass net duergaangen, fir ënnert déi 12 bescht Athleeten ze kommen. Hie gëtt um Enn de 14. ënner 22 Athleeten.

Mat enger Wäit vun 19,91 Meter huet sech dee leschte Sportler fir d'Finall qualifizéiert. Dem Lëtzebuerger säin nationale Rekord läit bei 22,22 Meter.