D'Extremschwëmmerin huet fir de 34 Kilometer laange Passage am kalifornesche Pazifik bei Los Angeles 13 Stonnen, 54 Minutten a 5 Sekonne gebraucht.

D'Paule Kremer ass an der Nuecht op en Donneschdeg duerch de Catalina Channel geschwommen. Dat si 34 Kilometer tëscht der Insel Santa Catalina a Los Angeles. Nom Äermelkanal war dat déi zweet Mierengt am Kader vum sougenannten "Ocean's Seven"-Projet. Dat si siwe Mierengten, déi queesch iwwer d'Welt verstreet sinn an déi bis elo just 21 Leit alleguerten duerchschwommen hunn.

Paule Kremer Catalina-Challenge / Rep. Rich Simon

2017 ass d'Paule Kremer duerch den Äermelkanal geschwommen. Wéinst ënnert anerem der Corona-Pandemie huet et awer bis elo gedauert, bis d'Lëtzebuergerin konnt duerch de Catalina Channel schwammen. Kuerz viru Mëtternuecht eiser Zäit ass d'Extremschwëmmerin zu Los Angeles ukomm. An dat no knapp 14 Stonnen, déi alles anescht wéi einfach waren.

"Ech sinn immens vill vu Jelliskäpp gepickt ginn. Dorunner gewinnt ee sech allerdéngs. Ech hu mech mussen iwwerginn, well relativ vill Wellegang war. Da gëtt een awer iergendwa séikrank als Schwëmmer. Dat hat ech insgesamt 3 Mol, iwwer d'Schwamme verdeelt."

Déi lescht Kilometer am Pazifik ware fir d'Paule Kremer immens laang.

"Wou mir virun der Küst waren, wousst ech net, wéi wäit et nach wier fir eran, well immens vill Niwwel war. Ech hunn eréischt an der leschter hallwer Stonn gesinn, wéi wäit ech ewech wier. Du wousst ech, datt ech géif ukommen."

D'Paule Kremer ass déi 34 Kilometer am Pazifik eleng geschwommen. Allerdéngs war och ëmmer eng Crew op engem Boot mat dobäi, fir d'Schwëmmerin esou gutt wéi méiglech ze ënnerstëtzen.

"Et ware Kolleege mat aus Lëtzebuerg, an déi hunn alles gemaach, datt ech mech wuel fillen. Si hu mäin Iesse gemaach an et hat ëmmer een en A op mech. Dat huet mir immens vill bedeit. Dann hat ech och zwee "Observer" u Bord, déi gekuckt hunn , datt näischt géif geschéien. E groussen Ënnerscheed zu der Manche war och, datt ech ëmmer ee Kayaker nieft mir hat. Et ass immens, een ze hunn, mat deem een direkt Aekontakt huet. Déi zwee Kayaker sinn der, déi dat immens oft maachen. Deen ee schwëmmt och esou Saachen. Dat heescht, si hu verstanen, wann et haart géif ginn. Si hu mir och gesot, schwamm hei méi séier oder méi lues."

Mam Äermelkanal an elo dem Catalina Channel huet d'Paule Kremer zwou vun de siwe Mierengte realiséiert. Déi zwou hunn eng Längt vu 34 Kilometer. Dat ass awer och schonns alles vu Gemeinsamkeeten.
"De gréissten Ënnerscheed ass d'Temperatur. D'Temperatur ass bei Los Angeles op 17 Grad gefall. Et ass awer net ze vergläichen, wann een déi 14 Stonne kal Temperaturen huet. Hei huet d'Waasser 21 Grad an dat ass schonns waarm."

Direkt no der Arrivée zu Los Angeles huet d'Paule Kremer och schonns un den nächsten Challenge geduecht.

"Wéi mir elo u Bord waren, hu mir iwwer 'Twenty Bridges' geschwat. Dat heescht, ronderëm Manhatten ze schwammen, zu New York. Dann hätt ech "Triple Crown" vum Open Water. Dat ass warscheinlech den nächste Projet fir 2023, fir ronderëm Manhatten ze schwammen."

De Projet "Ocean's Seven" ass och nach ëmmer am Hannerkapp vum Paule Kremer.