Lëtzebuerg spillt en Donneschdeg zu Istanbul um 20.45 Auer de fënnefte Match am Kader vun der Grupp 1 aus der Liga C vun der Nations League.

Nations League Tierkei-Lëtzebuerg / Reportage Serge Olmo

Et wunnen an der Stad Istanbul a ronderëm bal 16 Milliounen Awunner a ganz vill Leit si Supporter vun der tierkescher Nationalekipp, déi doriwwer eraus den Ament e gudde Laf huet. De Fatih Terim Stadion wäert mat ronn 17.500 Spectateuren ausverkaaft sinn. De Kader vum Favorit ass iwwerdeems net komplett. Do feelt zum Beispill de ganz wichtegen Hakan Calhanoglu, dee blesséiert ass.

Bei der FLF-Selektioun feele mat Olivier Thill, Christopher Martins, Mathias Olesen, Dirk Carlson a Chris Philipps vill a ganz wichteg Spiller mat individueller Klass. De Fait, datt wichteg Spiller bei de Roude Léiwe feelen, bréngt den Nationaltrainer Luc Holtz net aus dem Konzept. Hie wëll och déi hëtzeg Ambiance net iwwerbewäerten:

"Dat ass niewesächlech. Méi wichteg ass, wat um Terrain geschitt. Do sinn doudsécher 11 Tierken, déi wäerte motivéiert sinn. Et ass gewosst, datt mir deen een oder anere Spiller net dobäi hunn. Ech hunn awer schonn den Appell un d'Spiller gemaach. Mir mussen dat kompenséieren iwwer méi Kollektivitéit, méi Lafbereedschaft, e bësse méi Intensitéit an allem wou mir maachen an och duerch Aggressivitéit. Ech hoffen, datt hei eng oder déi aner Situatioun zu eise Gonschte spillt, esou datt mir kënnen den Tierken, déi nach kee Gol geschoss kruten, e Gol schéissen."

Fir den 19 Joer jonke Golkipp vum Progrès Eldin Latik ass d'Rees op Istanbul nach méi eng besonnesch Aventure, wéi fir déi aner international Spiller, well hien nach ni an d'A-Ekipp nominéiert gouf an et sech vläicht net esou séier erwaart hat. Am Ufank vun der Saison war hien d'Nummer 2 zu Nidderkuer an elo ass hie bei de Roude Léiwen. Hie kennt op jiddefalls seng Stäerkten:

"D'1-géint-1-Spill, d'Fousspill an d'Corneren. Ech sinn e bëssen iwwerrascht, datt et esou schnell geet. Ech war och nach ni an esou engem Stadion a freeë mech total." Et ass zimmlech kloer, datt de Latik en Donneschdeg net spille wäert, mä hien ass prett a wäert sécher villes bei deem Deplacement léieren.

Leschten Training virum Match

RTL

© Serge Olmo

E Mëttwoch den Owend ware am Fatih Terim Stadion esouwuel d’Pressekonferenz wéi och de leschten Training.

De Nationaltrainer Luc Holtz an de Lars Gerson haten sech de Froen vun de Journaliste gestallt.

FLF PK virum Match / Reportage Serge Olmo

Et ass gewosst, datt déi tierkesch Ekipp doheem déi éischt Plaz am Klassement well ënnermaueren. D’Spillermaterial huet si absolut an den Trainer Stefan Kuntz mécht och eng gutt Aarbecht.

Kann een deemno dovun ausgoen, datt d’Rout Léiwen defensiv wäerte stoen? Dacks huet een de Choix net, erkläert den Nationaltrainer Luc Holtz.  Ob een dat au Départ wëll oder net wëll, dat ass heiansdo d’Superioritéit vum Géigner, déi dat matsechbréngt. Mä Dir kennt mech gutt a wësst, dat et net onbedéngt mäi Wëllen ass, datt mir hanne leiden oder den Drock vum Géigner iwwer eis ergoe loossen .Wichteg ass et och, wa mir de Ball net hunn, datt mir awer eng gewësse Maîtrise hunn.

Wa bei der FLF Selektioun wichteg Spiller feelen an der Defense an am Mëttelfeld, dann ass et ganz intressant, datt en erfuere Mann wéi de Lars Gerson, deen esouwuel hanne wéi am Mëttelfeld ka spillen, nees fit ass. Haut fillen ech mech gutt. Ech hunn de Weekend meng éischt 90 Minutte nees duerchgespillt. Et ass gutt gaangen. Ech hu virun enger Woch mam Trainer geschwat. Ech hat och net geduecht, datt ech géif kommen, well ech quasi vum leschte Stage u blesséiert war. Ech si prett, alles ze ginn, sief et vun Ufank un, an der Paus oder zum Schluss.

Den Ufank vum Training war schonn e bësse speziell. D’FLF-Selektioun hat net de ganzen Terrain zur Verfügung. Een Deel war mat enger Baatsch zougedeckt. Den Trainer selwer huet den Terrain fräi gemaach. Et weess een nach net, ob dat Konsequenze wäert hunn.

De Match Tierkei-Lëtzebuerg ass en Donneschdeg den Owend um 20.45 Auer a gëtt live um Radio, op der Tëlee, op RTL.lu an um RTL Play iwwerdroen.