Donieft konnte sech och d'Packers no Verlängerung géint d'Cowboys duerchsetzen an d'Cardinals klappen d'Los Angeles Rams.

Seattle Seahawks - Tampa Bay Buccaneers 16:21

D'Tampa Bay Buccaneers hunn deen éischte Regular-Season-Match vun der NFL op däitschem Buedem mat 16:21 géint d'Seattle Seahawks gewonnen. Fir de Star-Quarterback Tom Brady ass et iwwerdeems domat no Mexiko, den USA a Groussbritannien dat véiert Land, an deem hien e Match gewënnt. D'Bucs louchen an der Paus mat 14:0 am Avantage an haten eigentlech alles ënner Kontroll, ma opgrond vun zwou Interceptions, eng vum Tom Brady an eng vum Leonard Fournette, sinn d'Seahawks nees zeréck an de Match komm. Um Enn konnt d'Ekipp aus dem sonnegen US-Bundesstaat Florida de Match gewannen an domat déi zweet Victoire noenee feieren.

Minnesota Vikings - Buffalo Bills 33:30

De Spëtzematch tëscht de Minnesota Vikings an de Buffalo Bills war de wuel bis elo beschte Match vun der Saison a war un Dramatik kaum ze iwwerbidden. D'Vikings wannen de Match no Verlängerung mat 33:30. Am drëtte Véierel waren d'Bills nach 17 Punkte vir, ma no engem laangen Touchdown-Laf vum Dalvin Cook an enger Interception vum Bills-Quarterback Josh Allen waren d'Gäscht nees am Spill. Virun allem déi lescht Minutt vun der regulärer Spillzäit hat et a sech. D'Vikings hu kuerz virun der Endzon de Ball un d'Bills missen ofginn, dat beim Stand vun 23:27 aus hirer Siicht. An der Suite hunn awer d'Bills de Ball verluer an d'Vikings-Defense konnt mat engem Touchdown op 30:27 stellen. Duerch e Field Goal vu Buffalo ass et dunn awer an d'Overtime gaangen. No engem Vikings-Field-Goal huet den Josh Allen du seng zweet Interception geheit an de Match war eriwwer.

RTL

© AFP

Dallas Cowboys - Green Bay Packers 28:31

Och de Match tëscht den Dallas Cowboys an de Green Bay Packers gouf eréischt an der Verlängerung decidéiert. Do gewannen d'Packers no 5 Néierlagen hannertenee mat 31:28. No ville schlechte Leeschtungen dës Saison wousst de Star-Quarterback an amtéierenden MVP, den Aaron Rodgers, endlech nees eng Kéier ze iwwerzeegen. Och de Rookie-Wide-Receiver Christian Watson hat mat 3 Touchdowns en éischte gudde Match an der NFL.

Washington Commanders - Philadelphia Eagles 32:21

Um Méindeg den Owend hunn d'Commanders misste bei déi bis ewell ongeschloen Eagles reesen a ware mat hirem knappe negative Record de kompletten Aussesäiter an dësem Match. Ma d'Ekipp ëm de Quarterback Taylor Heinicke huet sech net verstoppt. Nodeem si am éischte Véierel nach 14:7 hanne waren, hu si am zweete Quarter massiv ugerappt a si mat engem 20:14 Avantage an d'Paus gaangen. Dëse konnte si nom Pausentéi esouguer nach op 23:14 ausbauen, ma d'Eagles sinn direkt am Ufank vun der leschter Véierelstonn op 23:21 bäikomm. Mat engem Fieldgoal konnten d'Commanders hiren Avantage nach eng Kéier eropschrauwen, ma mat nach iwwer siwen an eng hallef Minutt op der Auer haten Hurts a Co nach massiv Zäit, fir de Match nach ze dréinen. Ma et sollt hinnen net geléngen: Beim éischte Versuch hu si de Ball verluer an och dono huet keng Ekipp sech um Terrain konnten duerchsetzen. Mam leschte Ballbesëtz a fënnef Sekonnen op der Auer hunn d'Eagles probéiert, de Ball a beschter Rugby-Manéier no vir ze bréngen, ma dem Smith seng Pass no hanne war net präzis, esou datt den Toohill de Ball konnt oprafen a fir d'Commanders an d'Endzon bréngen.

Alleguerten d'Resultater am Iwwerbléck

Atlanta Falcons - Carolina Panthers 15:25

Seattle Seahawks - Tampa Bay Buccaneers 16:21

Minnesota Vikings - Buffalo Bills 33:30

Detroit Lions - Chicago Bears 31:30

Denver Broncos - Tennessee Titans 10:17

Jacksonville Jaguars - Kansas City Chiefs 17:27

Cleveland Browns - Miami Dolphins 17:39

Houston Texans - New York Giants 16:24

New Orleans Saints - Pittsburgh Steelers 10:20

Indianapolis Colts - Las Vegas Raiders 25:20

Dallas Cowboys - Green Bay Packers 28:31

Arizona Cardinals - Los Angeles Rams 27:17

Los Angeles Chargers - San Francisco 49ers 16:22

Washington Commanders - Philadelphia Eagles 32:21