E Mëttwoch ware bei der Futtball-WM nees 4 Matcher, ënner anerem stoung fir Däitschland, Spuenien an d'Belsch den éischte Match um Programm.

Am éischte Match e Mëttwoch gouf et een 0:0 tëscht Marokko a Kroatien. Dono huet Däitschland sech iwwerraschend mat 1:2 géint Japan misse geschloe ginn. Am zweete Match vum Grupp E huet Spuenien Costa Rica mat 7:0 iwwerrannt. De leschte Match vum Dag konnten d'Belsch mat engem 1:0 géint Kanada fir sech entscheeden.

Resumé WM / Reportage Serge Olmo

Grupp E

Däitschland - Japan 1:2
1:0 Gündogan per Eelefmeter (33'), 1:1 Dōan (75'), 1:2 Asano (83')

Däitschland huet déi éischt Hallschent iwwer wäit Strecken dominéiert, dat virun allem a Saache Ballbesëtz (81 Prozent). Hei ware si de Japaner haushéich iwwerleeën. Japan huet sech gréisstendeels op d'Defense a séier Konterattacke konzentréiert an no esou enger Konterattack ass de Ball och eng éischte Kéier am Filet gelant. Wéinst enger Abseitspositioun huet dëse Gol awer net gezielt. Spéiderhi krut Däitschland no engem Foul vum japanesche Golkipp um Raum en Eelefmeter zougesprach. Den Ilkay Gündogan konnt dësen erasetzen an Däitschland domat a Féierung bréngen.

An der zweeter Hallschent hunn d'Japaner elo misse méi offensiv agéieren. Dat hat zur Konsequenz, datt et eng animéiert Partie war an den zweete 45 Minutte mat deels gudde Chancen op béide Säiten. Genotzt huet awer nëmmen eng Ekipp déi an zwar Japan. An der 75. Minutt huet de Ritsu Dōan vum SC Freiburg fir d'Blue Samurai den Ausgläich markéiert. 8 Minutte méi spéit konnt den Takuma Asano vum VfL Bochum d'Japaner esouguer a Féierung bréngen. An der Schlussphas hunn déi Däitsch natierlech nach eemol alles no vir geheit, ma et sollt och no 7 Minutten Nospillzäit beim 2:1 fir Japan bleiwen. Um Enn goufen d'Jonge vum Trainer Hansi flick fir hir schlecht Chancëverwäertung bestrooft a starte mat enger Néierlag an d'WM.

RTL

Spuenien - Costa Rica 7:0
1:0 Olmo (11'), 2:0 Asensio (21'), 3:0 Torres per Eelefmeter (31'), 4:0 Torres (54'), 5:0 Gavi (75'), 6:0 Soler (90'), 7:0 Morata (90+2')

D'Spuenier hunn an hirem éischte WM-Match vun Ufank un den Toun uginn. Si waren offensiv richteg geféierlech a konnten no nëmmen 11 Minutten duerch eng flott Aktioun vum Dani Olmo mat 1:0 a Féierung goen. Costa Rica hat immens vill Schwieregkeeten, d'Spuenier an de Grëff ze kréien an an der 21. Minutt konnt den Asensio schonns op 2:0 stellen. No ronn enger hallwer Stonn kruten d'Jonge vum Nationaltrainer Luis Enrique dunn no engem Foul um Jordi Alba och nach en Eelefmeter zougesprach. Dësen huet de Ferran Torres an der 31. Minutt eragesat.

Nom Säitewiessel hunn d'Spuenier do weidergemaach, wou se an der éischter Hallschent opgehalen hunn. An der 54. Minutt konnt de Ferran Torres nämlech mat sengem zweete perséinleche Gol op 4:0 erhéijen. D'Spuenier hunn no an no e bësse Vitess erausgeholl, konnten an der 75. Minutt a Persoun vum Gavi awer nach e fënnefte Gol markéieren. De Carlos Soler huet dunn an der 90. Minutt d'Dose voll gemaach, ier de Morata zwou Minutte méi spéit fir d'7:0-Schlussresultat gesuergt huet.

Grupp F

Marokko - Kroatien 0:0

An der éischter Hallschent sollte keng Goler falen tëscht Marokko a Kroatien. D'Nordafrikaner hunn an dësen éischte 45 Minutten awer richteg gutt matgehalen, och wa Kroatien méi Ballbesëtz hat. Richteg gutt Chancen haten d'Europäer awer eréischt ganz kuerz virun der Paus, wou de Bono am Gol vun de Marokkaner awer gutt opgepasst hat. Marokko huet propper no vir gespillt, aggressive Pressing gemaach, eenzeg hir Chancëverwäertung huet ze wënschen iwwereg gelooss.

Och déi zweet Hallschent war wéineg spektakulär. D'Marokkaner hunn et de Kroate weiderhi ganz schwéier gemaach, fir sech Chancen erauszespillen. Bis zum Schluss ass et bei dësem 0:0 bliwwen tëscht den Nordafrikaner an dem Vize-Weltmeeschter.

Belsch - Kanada 1:0
1:0 Batshuayi (44')

Fir d'Kanadier, fir déi et réischt déi zweete Weltmeeschterschaft ass, hätt de Match denkbar gutt kënnen ufänken. Dëst nodeems den Arbitter de Kanadier no engem Handspill vum Belsch Carrasco an der 10. Minutt en Eelefmeter zougesprach huet. Dëse konnt den Davies allerdéngs net verwandelen, soudatt de Courtois de Penalty, deen net gutt geschoss war, paréiere konnt. Allerdéngs hunn d'Kanadier monter weidergemaach a sech eng sëllege Chance kreéiert. D'Belsch haten dogéint Problemer, fir an de Match ze fannen. Esou konnten d'Belsch hir éischt richteg Chance réischt an der 23. Minutt verbuchen, mä dem Batshuayi säi Schoss konnt vun engem kanadeschen Defenseur blockéiert ginn. Allerdéngs hunn d'Kanadier d'Belsch och doropshin net an d'Spill komme gelooss. Den eenzege Manko un de Kanadier hirer Leeschtung war, datt si hir Dominanz net an e Gol ëmmënze konnten. Dëst sollt sech an der 44. Minutt am Numm vum Batshuayi rächen, deen aus dem Näischt den 1:0 fir d'Belsch markéiere konnt. Mat dësem Resultat ass et dunn och an d'Paus gaangen.

An der zweeter Hallschent hunn d'Kanadier nees fulminant ugefaangen an hunn nees schéin an zilstrebeg no vir gespillt. Allerdéngs konnte si de Ball net am Filet vun de Belsch ënnerbréngen. D'Belsch hunn an der zweeter Hallschent méi dogéint gehalen an haten an der 67. Minutt duerch de Batshuayi d'Chance op en 2:0 ze erhéijen. Dem Belsch säi Schoss konnt allerdéngs a leschter Sekonn blockéiert ginn. Duerno stoungen d'Belsch déif an hirer Hallschent an hunn d'Kanadier komme gelooss, déi doropshin d'Lächer an der Defense vun de Belsch net fonnt hunn, soudatt de Match a Punkto Chancen ofgeflaacht ass. Um Enn gewannen d'Belsch, obschonns si an der Defense heiansdo onsécher gewierkt hunn, mat 1:0 géint Kanada, wat intensiv gekämpft huet a monter opgetrueden ass.