Mainz an de Leandro Barreiro verléieren onglécklech an och den Tim Hall kasséiert eng batter Néierlag géint den Tabellenéischten.

Sonndeg

Am däitsche Futtball war et kee gudden Dag fir d'Lëtzebuerger. De Leandro Barreiro huet mat Mainz eng éischt Defaite ënner dem Interimstrainer mussen astiechen. Mainz huet zum Deel onglécklech 0:1 géint Freiburg verluer, wou och de Lëtzebuerger Nationalspiller eng Rei gutt Aktioune virum Gol hat.

An der zweeter däitscher Liga ass Elversberg, d'Ekipp vum Co-Trainer Raphael Duarte, mat 1:5 bei Hertha Berlin ënner d'Rieder komm. No der éischter Hallschent war de Match nach op, mee uschléissend huet Berlin Elversberg un d'Mauer gespillt. D'Saarlänner stinn an der Tabell awer weiderhi virun der Hertha.

Kongsvinger huet de leschte Match ëm den Opstig an déi éischt norweegesch Liga verluer a bleift domat e weidert Joer an der zweethéchster Divisioun. D'Ekipp vum Lars Gerson louch fréi 0:1 hannen, éier een no der Paus séier ausgläiche konnt. Duerno huet Kristiansund de Score op 4:1 erhéicht a Kongsvinger hat keng Äntwert dorop. De Lars Gerson stoung am leschte Match vun der Saison wärend 90 Minutten um Terrain.

Beim 0:0 vun Austria Wien a Linz stoung de Marvin Martins 90 Minutten um Terrain.

De Vincent Thill koum bei der 2:0-Victoire vu Sabah Baku an Aserbaidjan vun der Bänk. De Lëtzebuerger gouf an der 72. Minutt agewiesselt, wéi scho béid Goler gefall waren. Sabah Baku steet an der Tabell am gesécherte Mëttelfeld.

An Ungarn huet den Tim Hall eng batter 1:2-Néierlag kasséiert. Säi Veräin Ujpest konnt eng fréi Féierung vum Tabelleleader Paks séier ausgläichen, hat um Enn awer net déi néideg Reussite virum Gol, fir nach e Punkt matzehuelen. Den Hall gouf kuerz no der Paus agewiesselt.

Bei der 2:1-Victoire vun Union Saint-Gilloise géint de Cercle Bruges stoung den Anthony Moris déi 90 Minutten iwwer am Gol. Déi dräi Goler sinn tëscht der 27. an 33. Minutt gefall. Dat mam 1:0 an 2:0 vu der Union innerhalb vu 4 Minutten an der Äntwert 2 Minutten nom 2:0.

Samschdeg

An der franséischer Ligue 2 stoung de Maxime Chanot bei Ajaccio wéi gewinnt an der Startformatioun. Hien huet beim 1:1 géint den Tabellenzweeten Angers de ganze Match gespillt a krut an der 64. Minutt eng giel Kaart.

Bastia mam Florian Bohnert huet an der Ligue 2 iwwerdeems spéit mat 0:1 géint Caen de Kierzere gezunn. De Lëtzebuerger huet déi 90 Minutten absolvéiert. Bastia läit no der Defaite an der Tabell just ee Punkt virun enger Ofstigsplaz.

An der zweeter tierkescher Liga huet Sanliurfaspor sech doheem misse mat 0:2 géint Bodrumspor geschloe ginn. Den Olivier Thill ass bei der Lokalekipp no enger Stonn beim Stand vun 0:2 agewiesselt ginn, konnt d'Defaite awer och net méi verhënneren.

No enger méi laanger Verletzung huet de jonken Yvandro Borges bei Mönchengladbach säi Comeback am Kader gefeiert. Géint Hoffenheim gouf et eng 2:1-Victoire, de Lëtzebuerger ass allerdéngs net zum Asaz komm.

An der zweeter Bundesliga huet Magdeburg sech däitlech mat 4:1 géint Kaiserslautern duerchgesat, déi ënnert der Woch den Trainer entlooss hunn. Bei Magdeburg stoung de jonken Eldin Dzogovic net am Kader.

An der drëtter Liga an Däitschland stoung de Laurent Jans wéi gewinnt déi 90 Minutten iwwer fir Waldhof Mannheim um Terrain. Um Enn huet ee mat engem 1:1-Remis géint Ingolstadt d'Punkte gedeelt. Et ass ee Punkt, dee Mannheim am Ofstigskampf net wierklech weiderhëlleft.

Freideg

Den Enes Mahmutovic stoung am Derby an der Bulgarescher 1. Liga bei ZSKA Sofia an der Startformatioun, am Auswäertsmatch géint Slavia Sofia. ZSKA war an der 67. Minutt duerch e Selbstgoal vum Georgiev mat 1:0 a Féierung gaangen. An der 86. Minutt konnt de Raychev awer op 1:1 ausgläichen. Bei deem Resultat ass et dunn och bliwwen.

1. Liga a Polen: De Sébastien Thill krut et mat sengem Veräin Rzeszow auswäerts mat Polonia ze dinn. No 12 Minutte war Polonia scho mat 2:0 vir, dat duerch zwee Goler vum Bajdur. An der 32. Minutt konnt den Oleksy op 2:1 verkierzen. An der 63. Minutt war et den 2:2 duerch de Wachowiak. Dobäi sollt et och bleiwen. De Lëtzebuerger huet de komplette Match duerchgespillt.

An der 2. Liga an Éisträich huet St. Pölten mam Dirk Carlson géint den SK Sturm Graz gespillt. De Lëtzebuerger Nationalspiller stoung an der Startformatioun a konnt sech an der 11. Minutt iwwert d'1:0-Féierung duerch en Eelefmeter vum Keiblinger freeën. An der 23. Minutt huet den Dadic op 2:0 erhéicht an an der 40. Minutt war et de Lëtzebuerger, deen de Score op 3:0 erhéicht huet. An der 84. Minutt ass zwar nach den 3:1 gefall, ma um Enn goufen et 3 wichteg Punkte fir Sankt Pölten, déi elo op der 3. Plaz an der Tabell stinn.

An der 2. Bundesliga souz den Danel Sinani beim FC St. Pauli op der Bänk, wéi et am Derby géint den HSV gaangen ass. No den éischte 45 Minutte war St. Pauli 2:0 vir, dat duerch Goler vum Irvine an der 15. Minutt an duerch e Selbstgol vum Golkeeper Heuer Fernandes an der 27. Minutt, deen eng Réckpass kuerz virum Gol wollt degagéieren, ma de Ball ass versprongen an am eegene Gol gelant. An der 2. Hallschent huet den HSV du bannent just 2 Minutten nees fir den Ausgläich gesuergt, dat duerch Goler vum Glatzel (58.) an dem Pherai (60.).

RTL

An der 1. Bundesliga krut den SV Darmstadt 98 Besuch vum 1. FC Köln mam Lëtzebuerger Mathias Olesen, deen awer net vun Ufank un um Terrain stoung. Et huet dann och 60 Minutte gedauert, bis den éischte Gol gefall ass, an dat zu Gonschte vun de Kölner. Den Davie Selke konnt an d'Gäscht mat 1:0 a Féierung bréngen. E vermeindlechen 2:0 duerch de Maina gouf no Videobeweis annuléiert. Et goung Schlag op Schlag. An der 72. Minutt gouf dunn en Händs-Eelefmeter fir Darmstadt och nees duerch de VAR annuléiert.

An der 85. Minutt gouf dunn de Mathias Olesen fir de Linton Maina agewiesselt. Um Score sollt sech, trotz 5 Minutten Nospillzäit, näischt méi änneren. Duerch déi Victoire vu Köln géint Darmstadt tausche béid Veräiner hir Positioun an der Tabell, dat op de Plaze 15 a 16. Allebéid hu se no 13 Spilldeeg eréischt 9 Punkten.