Et gëtt wahrscheinlech näischt méi britësches wéi „Fish and chips“.

Fish and Chips mat Mushy Peas

RTL

Et gëtt wahrscheinlech näischt méi britësches wéi „Fish and chips“. Tradionnell gëtt dëse Plat mat e puer Drëppse Malzesseg an an enger Zeitung ëmwéckelt, zervéiert.

Äisschaf: 15min – Prep: 30mins – Uewen 15 mins – Fritéieren: 12-16 min – Persounen: 4 – Mëttelschwéier

Deeg fir de Fësch:

200g Miel
1 ½ Zoppeläffelen Backpulver
275 ml kale Béier
1 Zoppeläffel Salz
1l Sonneblummenueleg

4 Cabillauds- oder Aiglefins-Fileten (approx. 800g)

Fir d’Fritten am Uewen:

750g Desiree Gromperen
4 Zoppeläffelen Sonneblummenueleg
Malzesseg fir dobäi (optional)

Fir den Ierbessebräi:

600g gefrueren Ierbessen
10g Botter
2 Zoppeläffele kleng gehackte Menthe
2 Zoppeläffele Jus vun engem grénger Zitroun

Fir d’Sauce Tartare:

1 Eegiel
1 Zoppeläffelen Moschter
100ml Sonneblummenueleg
1 ½ Zoppeläffelen Jus vun enger grénger Zitroun
1 Zoppeläffel kleng gehackte Kaperen
1 Zoppeläffel kleng gehackte Cornichonen

Preparatioun:

Fänkt un mat der Sauce Tartare. D’Ee an de Moschter ginn an eng Schossel gemat a mat engem Mixer gemëscht. De Sonneblummenueleg lues a lues draschëdden ouni mam Mixer opzehalen. De Jus vun der grénger Zitroun, d’Kaperen an d’Cornichonen dobäimaachen a mat Salz a Peffer wierzen. Duerno déi fäerdeg Sauce an eng Schësselche maachen, mat enger Frischhaltefolie zoumaachen an an de Frigo stellen bis se gebraucht gëtt.

Stellt d’Miel fir den Deeg vum Fësch fir 15 Minutten an den Äisschaf.

Den Uewen op 220°C virhëtzen. Schielt d’Gromperen a schneid se a gläichgrouss Stécker. Kacht uschléissend d’Gromperen während 3 Minutten  a kachendem Salzwaasser, duerno ofschëdden an op e Bakblesch leeën. D’Grompere mat Sonneblummenueleg besprinselen a mal Salz wierzen. D’Gromperen solle fir 15-20 Minutten am Schäffche goen a sollen op mannst zweemol gedréint ginn bis se goldeg a knuspereg sinn.

Während dem gëtt den Deeg fir de Fësch preparéiert. Huelt dat kaalt Miel aus dem Äisschaf a gitt dat zesumme mam Backpulver an eng Schossel, schëtt de kale Béier während dem Dir ëmréiert dran.

An enger bësse méi héicher Pan (oder grousst Dëppen) gëtt de Sonneblummenueleg sou vill erhëtzt sou datt wann een eng Drëpps Deeg dramécht deen ufänkt mat knisteren. Daucht 2 Fësch-Fileten an den Deeg, sou datt se komplett mat Deeg bedeckt sinn, d’Fileten da virsichteg an de gliddegen Ueleg leeën a fir 6-8 Minutte goe loosse bis se gutt goldeg a knuspereg sinn. Huelt de Fësch aus dem Fett, leet se op de Bakblesch, mat Aluminiumspabéiert zoudécken an an de waarmen Uewe maachen fir dat se waarm bleiwen. Mam Rescht vun de Fileten dës Prozedur widderhuelen.

Den Ierbessebräi gëtt während de Fësch fittéiert virbereed. D’Ierbesse ginn a waarmem Salzwaasser 5 Minute gekacht, duerno ofgeschodd an an e Kachdëppe gemat. De Botter dobäi ginn, d’Menthe an de Jus vun der grénger Zitroun bäiginn a mat Salz a Päffer asaisonnéieren. Duerno mat engem Handmixer zu Bräi vermëschen.

Fir datt dëse Plat richteg authentesch schmaacht, zervéiert ee bei Fish and Chips e bësse Malzesseg.

Judd mat Gaardebounen Pie

RTL

Wann et een typesche lëtzebuerger Plat gëtt, dann ass et Judd mat Gaardebounen. Lo stellt Iech emol vir datt een déi lëtzebuergesch Kichen mat där aus Groussbritanien zesummendeet – e klenge „clin d’oeil“ an dem Anne seng Wuerzelen an e klenge Wénk fir seng nei Heemescht.

Prep 30 min – Uewen 30min – Persounen 8 - Einfach

900g Judd, fäerdeg gekacht
600g Gaardebounen
3 Kaffisläffelen Bounekraitschen
750ml Geméisbouillon
8 Zoppeläffele Maismiel
100ml Rahm
400g fäerdeg gerulltene Bliederdeeg
1 Eegiel
E Saz Mëllech

Preparatioun:

Vum Judd d’Fett ewechmaachen an duerno a mondgerescht Stécker schneiden

D’Gaardebounen ofschëdden a se ënner fléissendem Waasser gutt spullen an an se zesumme mam Fleescha an en Dëppe maachen. D’Bounekraitschen bäiginn, dat Ganzt mam Bouillon iwwerschëdden a kache loossen.

D’Maismiel an eng kleng Schësselche maachen, mat e puer klenge Läffele waarmem Bouillon vermëschen bis et déckflësseg gëtt. Dës Mëschung dann an d’Dëppen dobäiginn a fir nach ongeféier 1 Minutt kache loossen.

D’Dëppen vum Feier erofhuelen, d’Rahm dobäi maachen an dat an eng Taarteform schëdden (approx. 30 x 20 cm)

Den Uewen op 200 °C ophëtzen.

D’Ecker vun der Taarteform mat Botter areiwen an den Deeg dropleeën. Ronderëm musst Dir den iwwerflëssegen Deeg ewechschneiden. D’Ee mat der Mëllech mat engem Biese klappen a mat engem Pinsel den Deeg domatter areiwen. Mam Rescht vum Deeg kënnt Dir nach kleng Bliederformen erausschneiden déi Dir dann op den Deckel vun Ärem Kuch leet. Dës Bliedercher sollen dann och mat der Eeërmëschung bepinselt ginn.

D’Pie fir 30 Minuten an de Scheffche goe losse bis den Deckel opgaangen a schéi goldeg ginn ass.

Dëse Plat schmaacht am beschte mat enger grénger Zalot.

Cheat's Trifle

RTL

Et kann e soen datt d'Trifle déi englesch Äntwert op den Tiramisu ass, verschidde Schichten vun engem mat Alkohol duerchtränkte Biscuit, enger gudder schmantecher Eeërcrème a Friichten. Fir dësen Dessert ouni e bëssen ze fuddelen ze maachen ass eng heeden Aarbecht. Sou huele mir aplaz vun der Eeërcrème, Mascarponne a Klappschmannt (Schlagsahne) fir d’Fëllung. Als klenge lëtzebuergeschen Touch, huele mir eng Mirabellen-Drëpp, wa keng Mirabelle do ass da kann een och Grappa huelen.

Prep: 20 mins – Persounen 8-10 – Einfach 

150 g rengen Zocker
50 ml Mirabellen-Drëpp (oder Grappa)
2 Eeër
250 g Mascarpone
400 ml Klappschmannt (Schlagsahne)
1 Pak Vanillszocker oder 1 Kaffisläffel Vanillsessenz
80 g Hambiersgebees
150 g Boudoirs (biscuits à la cuillère)
250 g Hambier + e Grapp voll fir d’Decoratioun

Preparatioun:

Schëdd 50 g Zocker mat 50 ml Waasser an e klengt Dëppen. D’Zockerwaasser op klenger Flam réieren bis den Zocker sech ganz opgeléisst huet (Basis fir e Sirop). Vum Gas erofhuelen a lues kal gi loossen. De Schnapps aréieren an op d’Säit stellen.

Deelt d’Eeër an zwou kleng Schësselcher op. Dat Wäisst vum Ee gëtt dann zu Schnéi geschloen.

An der anerer Schësselchen gëtt d’Eegiel mam Rescht vum Zocker vermëscht bis d’Mëschung hell ass. D’Mascarpone dobäi ginn an nees ëmréieren.

D’Klappschmannt an de Vanillszocker an enger aner Schossel klappen bis se steif sinn.

Virsichteg 2/3 vun der Klappschmannt huelen a mat der Eeër/Mascarponemëschung vermëschen. De Rescht vun der Klappschmannt an de Frigo stelle bis se gebraucht gëtt.

Huelt eng grouss Schossel déi Dir och herno fir ze zervéiere kënnt benotzen a bedeckt de Fong matt Hambiergebees.

Schëdd de Mirabellesirop an e breede Plat an zappt d’Kichelcher bis zu Halschent dran sou datt se de Liquide kënnen ophuelen. Leet d’Kichelcher op d’Hambiersgebees, verdeelt d’Halschent vun den Hambier a maacht dann d’Halschent vun Eeër/Mascarponemëschung drop.

Matt de Kichelcher, dem Hambier a mat der Crème widderhuelen.

Wann Dir fäerdeg sidd, maacht iwwert d’Schossel eng Frischhaltefolie. An de Frigo fir 2-3 Stonne stellen fir datt sech déi verschidde Goûten gutt entwéckele kënnen.

Just ier Dir zervéiere wëllt, verdeelt de Rescht vun der Klappschmat iwwert den Trifle an decoréiert mat e puer Hambier.