Dës Kéier geet et op Berlin... eng vun dem Anne senge Lieblingsstied.

Bouneschlupp mat Zoppeknödel

RTL

Bouneschlupp ass aus der lëtzebuerger Kichen nët ewechzedenken. D’Anne mengt souguer datt et esou vill verschidde Variatioune gëtt, wéi et Lëtzebuerger gëtt – jiddereen huet säin eegent Rezept. Verschidde Leit maache Rahm dran, anerer nees Wäin, déi eng hu Wierschtercher gären dobäi anerer hu se léiwer vegetaresch. Awer d’Grondlagen sinn ëmmer déi selwescht, gréng Bounen a Gromperen an engem Bouillon. An den däitschen Zoppendëppen brutschen dacks Knödel déi d’Anne och ganz gären huet. Fir seng ganz speziel “Bouneschlupp” huet et déi gewéinlech Gromperestécker duerch Knödel ersat. Awer natierlech net egal wéi eng Knödel! Locker, liicht Knödel aus wäissem Kéis ginn nämlech dësem lëtzebuerger Plat eng däitsch Nout déi einfach nëmme gutt schmaacht.

Fir 4 Persounen • Virbereedung 50 Min. • Einfach

Fir d’Knödel mat wäissem Kéis:
100 g wäisse Kéis
30 g mëlle Botter
2 Eegiel
50 g Panéiermiel
2 EL Parmesan
1⁄2 EL Miel
2 EL reng geschniddene frësche Péiterséileg
Muskat
Salz a Peffer

Fir d’Zopp:
1 Zwiwwel
30 g Botter
100 g Speckwierfelen
1 Bouillonscube
1 Lorbeerblat
1⁄4 TL Bounekraitchen (Sarriette)
400 g gréng Bounen
1 grouss Gromper
3 EL reng geschniddene frësche Péiterséileg
Salz a Peffer

Fir d’éischt gëtt den Deeg fir d’Ködel virbereet. De Botter an d’Eegiel mat enger Fourchette zu enger Crème réieren. D’Panéiermiel, de Parmesan, d’Miel an de Péiterséileg dobäiginn a mat Muskat, Salz a Peffer wierzen. Gutt mëschen an 30 Minutte laang kal stellen.

Fir d’Zopp ze preparéieren, d’Zwiwwel schilen a reng schneiden. De Botter an engem groussen Dëppen schmëlzen, d’Zwiwwelen an de Speck 4 broden.

De Cube mat ½ Liter waarmem Waasser opléisen an bei d’Zwiwwel-Speck Mëschung dobäiginn. D’Lorbeerblat an d’Bounekräitchen dobäiginn.

D’Bounen a mondgerecht Stécker schneiden a mat dem Bouillon vermëschen. D’Zopp opkachen, d’Temperatur erofsetzen an zougedeckt 8 Minutte laang goe loossen.

D’Grompere schielen, kleng reiwen an no 8 Minutten an d’Zopp ginn. Weider 5 Minutten zougedeckt kache loossen. D’Zopp vum Gas huelen, de Péiterséileg drastreeën, zoudecken an op d’Säit stellen.

Fir d’Preparatioun vun de Knödel, den Deeg huelen an ongeféier 20 walnossgrouss Knödel mat den Hänn maachen an op en Teller leeën.

D’Knödel an en Dëppe mat kachendem Salzwaasser ginn, d’Temperatur reduzéieren bis d’Waasser net méi kacht. Wann d’Knödel uewe sinn, nach weider 8 Minutten zéie loossen. Mat dem Schaumläffel déi fäerdeg Knödel aus dem Waasser huelen.

D’Zopp nees eram opkache loossen an d’Bouneschlupp mat de Knödel op 4 Zoppentellere verdeelen.

Brezel-Schnitzel mat Gromperenzalot

RTL

Schnitzel a Gromperenzalot gehéieren zu Däitschland wéi d’Brandenburger Tor zu Berlin. Ok, villäicht denkt Dir, de Schnitzel kënnt jo awer aus Éisterräich, wat natierlech stëmmt, awer déi Däitsch hunn “hir” Schnitzel immens gär. Et geet einfach net ouni! Dem Anne Faber seng Gromperenzalot mécht et – typesch lëtzebuergesch – mat Mayonnaise, awer zu Berlin gëtt et eng Manéier fir dës Zalot ze preparéieren, nämlech mat Geméisbouillon. Sou ass se manner fetteg an dowéinst och eng gutt Bäilag zu engem gebrodene Schnitzel. Brezel-Grimmelen ass eng méi aussergewéinlech Alternativ, awer Dir kënnt och normal Chapelure benotzen.

Fir 4 Persounen • E bëssen opwenneg

Fir d'Gromperenzalot: Virbereedung 40 Min. • Roue loossen 1:10 h
Fir d’Schnitzelen: Virbereedung 20 Min.

Fir d’Gromperenzalot:
800 g festkachend Gromperen
1 kleng Zwiwwel
4 EL Sonneblummenueleg
50 g agemaachte Cornichonen
1 1⁄2 TL Moschter
2 1⁄2 EL Wäisswäinesseg
e bëssen Zocker
200 ml waarme Geméisbouillon
Salz a Peffer
2 EL reng geschniddene Péiterséileg

Fir d’Schnitzelen:
200 g Salzbrezelen
2 Eeër
2 EL Rahm
50 g Miel
4 dënn Kallefs-Schnitzelen (ca. 160 g / Schnitzel)
160 g Botter
4 Zitrounestécker

Fir unzefänken, gëtt d’Gromperenzalot preparéiert. D’Grompere musse gewäsch ginn an an engem Dëppen mat Salzwaasser geluecht ginn. D’Dëppen zoumaachen an d’Gromperen 20 Minutte laang kache loossen.

An der Tëschzäit, d’Zwiwwel schielen a reng schneiden. 1 EL Sonneblummenueleg an enger Pan waarm maachen, d’Zwiwwel 2 Minutte laang dënsten an an eng grouss Schossel maachen.
D’Cornichonen reng schneiden an och an d’Schossel ginn.

De Moschter, de Wäisswäinesseg an e bëssen Zocker an enger klenger Schossel vermëschen an op d’Säit stellen.

D’Gromperen ofschëdden an ënnert fléissendem kale Waasser kuerz ofschrecken. 10 Minutte laang ofkille loossen, fir se besser ze schielen. D’Grompere schielen an an ½ cm déck Scheiwe schneiden an an d’Schossel maachen.

De waarme Bouillon iwwert d’Grompere schëdden, d’Vinaigrette dobäiginn a mat Salz a Peffer wierzen. D’Grompere lues dréinen, dann d’Schossel zoudecken an 1 gutt Stonn zéie loossen. Heiansdo d’Zalot virsiichteg dréinen.

No enger Stonn gëtt déi 3 EL Sonneblummenueleg an d’Zalot ginn an de Péiterséileg gëtt driwwer gestreet. Mat Salz a Peffer nach eng Kéier nowierzen.

Wann d’Zalot fäerdeg ass, ass et un der Zäit fir d’Schnitzelen virzebereeden.

D’Brezelen an e Gefréiertuut maachen a mat engem Nuddelholz kleng maachen, bis kleng Grimmelen enstinn. D’Grimmelen op Teller maachen.

D’Eeër an engem Zoppenteller opschloen. D’Rahm dobäiginn an zesumme vermëschen. D’Miel op en aneren Teller maachen.

D’Schnitzelen op e Briet leeën a wann néideg mat engem Nuddelholz méi dënn klappen. Déi zwou Säite vum Schnitzel mat Salz a Peffer wierzen.

All Schnitzel fir d’éischt an d’Mierl zappen, dann am Ee dréinen a mat de Brezelgrimmele panéieren.

An zwou Panen 80g Botter schmëlzen an 2 Schnitzele pro Pan 3 Minutte laang pro Säit broden. D’Pan dobäi regeleméisseg schwenken, datt d’Schnitzele gutt am Fett schwammen. D’Schnitzelen aus der Pan huelen an op engem Teller mat Kichepabeier ofdrëpse loossen.

D’Schnitzel mat den Zitrounestécker a mat der Gromperenzalot zerwéieren.

Currywurst

RTL

Currywurst ass typesch däitsch a gehéiert zu dem Berliner Liewen einfach dobäi. D’Currywurst ass Streetfood mat Kultfaktor an d’Berliner hunn dëser Wurscht souguer e Musée dediéiert. D’Anne mécht seng Currywurst mat enger gudder Lëtzebuerger Grillwurscht.

Fir 4-6 Persounen • Virbereedung 25 Min. • Einfach
Fir d’Currysauce:
1 Zwiwwel
1 EL Sonneblummenueleg
500 ml passéiert Tomaten
2 EL Hunneg
4 TL Currypolver
1 TL Paprikapolver
2 TL Worcestersauce
3 TL Geméisbouillon
2 TL Balsamico-Esseg
4 e bëssen Tabasco
6 Lëtzebuerger Grillwurschten
1 EL Sonneblummenueleg

Fir d’Sauce, d’Zwiwwel schielen a kleng schneiden. 1 EL Sonneblummenueleg an engem Dëppe waarm maachen an d’Zwiwwel doranner brode bis se glaseg ass.

D’Tomaten, de Hunneg, de Curryplver, de Paprikapolver, Worcestersauce, de Bouillon, de Balsamico-Esseg an de Tabasco dobäi ginn an opkache loossen. Vum Gas erofhuelen an mat engem Handmixer zu enger seimecher Sauce mixen a waarm stellen.

D’Wirschtecher mat engem Messer aritzen. De Sonneblummenueleg an enger grousser Pan waarm maachen a bei mëttlerer Hëtzt 8 – 10 Minutte broden. Regelméisseg dréinen.

D’Grillwurscht herno a mondgerecht Scheiwe schneiden, vill Sauce op all Portioun verdeelen a mat Currypolver bestreeën. Dozou eng gutt Portioun Fritten zerwéieren.