Den Alain Hostert, aus der Hotelschoul vun Dikrech, préparéiert mam Shane a mam Moriconi zesumme gratinéiert Mullen.

Ingrediente fir 4 Leit

Moules de Zélande                 20-24 Stéck gekacht oder 500g frësch
Piniekären                             50g
Basilikum                              1 Strauss
Tomates confites                    50g
Oliven (ouni Steng)                12 Stéck
Parmesan                                100g
Peffer
Olivenueleg             

Preparatioun

Fir dës kleng Entrée, respektiv Amuse-bouche kann een d’Reschter vum Virdag verschaffen oder 500g Mullen mat Ënnen, Zelleri, engem Schotz Wäin a Peffer frësch zoubereeden.

D’Mullen aus de Schuele léisen, déi hallef Schuelen op e Bakblech leeën an d’Mullen zréck an d‘Schuele leeën.

D’Piniekäre liicht an enger dréchener Pan réischteren an ofkille loossen. D’Oliven an d’Tomaten a ganz kleng Stécker haken, de Basilikum kleng schneiden. All d’Ingrediente fir déi „Salsa“ an eng Schossel ginn, e Schotz Oliveueleg driwwer ginn a mat Peffer ofschmaachen. De Parmesan rappen.

Iwwer all Mull e klenge Läffel „Salsa“ ginn a verdeele bis d’Ingredienten opgebraucht sinn. Um Enn de Parmesan driwwer streeën.

D’Mullen am Schäffchen 1-2 Minutten ënnert de Grill setzen, bis de Parmesan geschmollt ass an d’Mulle waarm sinn.

Eraushuelen an op engem Plat oder op 4 klengen Telleren dresséieren.