Den Alain Hoster aus der Hotelschoul vun Dikrech preaparéiert mam Shane a mam Mori St.Jacques op eng speziell Art a Weis.

Ingrediente fir 4 Leit

Noix de St. Jacques                 8 Stéck
Ënnen                                     1 Stéck          
Moere Speck                           100g
Bliederdeeg                            250g
Bratzelen                                2 Iessläffel
Eeër                                        1 Stéck
Fleur de sel, Peffer
Olivenueleg

Grafft Salz                               200g
4 eidel St. Jacques Muschele mat Deckel

Preparatioun

D’Ënn an de Speck an dënn Sträife schneiden a kuerz an enger Pan ausloossen, bis d’Ënn duerchsiichteg ass. D’Noix de St.Jacques preparéieren, dee klenge wäisse Muskel erofhuelen (dee géif beim Kachen zéi ginn).

De Speck an d’Ënn an déi eidel Muschele verdeelen, 2 Nëss drop setzen, pefferen a liicht salzen, e klenge Filet Olivenueleg drop ginn an d’Bratzelen driwwer streeën.

De Schäffchen op 180 Grad virwiermen. De Bliederdeeg an 3 Zentimeter breet Sträife schneiden. D’Ee opklappen an de Bliederdeeg domat asträichen. Op all Muschel den Deckel driwwer setzen a mam Deeg ronderëm zumaachen (d’Säit mam Ee kënnt no bannen, fir dass den Deeg un der Muschel pecht). Den Deeg ronderëm mam Rescht vum Ee asträichen an d’Muschele fir 15 Minutten an de Schäffche setzen.

Op 4 Telleren d’grafft Salz verdeelen a kleng Kéipercher formen. Déi waarm an zoue St.Jacques op d’Salz setzen an zerwéieren.