HaffDe Prënz Louis an d'Prinzessin Tessy loosse sech scheeden

De groussherzoglechen Haff deelt mat, dat de Prënz Louis an d'Prinzessin Tessy sech wëlle scheede loossen.

De Grand-Duc Henri an d'Grande-Duchesse Marie Teresa schwätzen am Schreiwes vu schwieregen Zäiten a froen fir d'Privatssphär vun der Koppel ze respektéieren.

Reportage: Scheedung um Haff (19.01.2017)
Vill Leit huet d'Ukënnegung vun der Prënzescheedung betraff.

An och déi international Presse huet d'Noriicht opgegraff.


De Prënz Louis an déi biergerlech Tessy Antony waren den 29. September 2006 mat grad emol 20 Joer zu Gilsdref bestuet ginn. Dat kuerz no der Gebuert vun hirem éischte Kand, dem Prënz Gabriel Michael Louis Ronny. Ee Joer drop koum hiren zweete Bouf op d'Welt, de Prënz Noah Etienne Guillaume Gabriel Matthias Xavier. Déi zwee Kanner hunn haut 10, respektiv 9 Joer.

De Prënz Louis war deemools eréischt 19 Joer al, wéi public gouf, datt e géif Papp ginn. Haut ass den 3. Bouf vum Grand-Duc Henri 30 Joer al. Bei der Hochzäit mat der biergerlecher Tessy – si war deemools Zaldotin – huet hien op seng Plaz an der Trounfolleg verzicht.

Dës Trennung ass déi zweet an där rezenter Familljegeschicht vum groussherzoglechen Haff. 2004 gouf de Prënz Jean, de Brudder vum Grand-Duc Henri vu senger deemoleger Fra Hélène Vestur, no 17 Joer Bestietnis gescheet.

"Prinzessin", duerf sech d'Fra vum Prënz Louis no der Scheedung net méi nennen. D'Tessy Antony hat dësen Titel am Joer 2009 vum Grand-Duc Henri decernéiert krut. Den Titel "Prinzessin vu Lëtzebuerg, Prinzessin vun Nassau a Bourbon-Parma", muss si no der Scheedung ofginn, wéi aus engem groussherzoglechen Dekret iwwert de Familljestatut vum groussherzoglechen Haff vun 2012 ervirgeet.

D'Koppel wunnt a schafft den Ament zu London.


Am September hat d'Koppel nach am Kader vun hirem 10. Hochzäitsdag, enger RTL-Equipe e ganz exklusiven Interview ginn:

Reportage: Prënz Louis & Prinzessin Tessy am Interview (28.09.2016)
Um 29. September 2016 sinn et genee 10 Joer hir, datt de Prënz Louis an d'Prinzessin Tessy sech d'Jo-Wuert ginn hunn.

Am Interview mam Deborah Ceccacci blécke si nach emol zréck op dës 10 Joren, op hir Hochzäit, erzielen iwwert hir Kanner an hiert Liewen an der britescher Haaptstad.



COMMUNIQUE DE LA COUR GRAND-DUCALE

Leurs Altesses Royales le Grand-Duc et la Grande-Duchesse ont le regret d’annoncer que le Prince Louis et la Princesse Tessy ont décidé de divorcer. Dans ces circonstances douloureuses, ils comptent sur la compréhension de tous pour respecter la sphère privée du couple et de leurs enfants.

 

Palais grand-ducal, le 18 janvier 2017