KeespeltPräzedenzfall: 2 geschützten Haiser goufen ofgerappt

"Luxembourg Patrimoine" a "Sauvegarde du Patrimoine" bedaueren, datt zu Keespelt an der Gemeng Kielen zwee geschützten Haiser ofgerappt goufen.

© Asbl Sauvegarde du Patrimoine
Hei gëtt e Präzedenzfall geschafen, dee grave Konsequenze kéint hunn, fäerten d'Organisatiounen a weise mam Fanger op de Kulturministère.

Et geet ëm d'Haiser 15 a 17 an der Mierscher Strooss. Se goufen ofgerappt an et komme Wunnengen an d'Plaz. Op Fotoen aus de leschte Jore gesäit een, datt d'Haiser net wierklech an engem gudden Zoustand waren. Egal, seet de Jochen Zenthöfer vun der asbl "Sauvegarde du patrimoine". D'Haiser hätte kënne restauréiert ginn. Et wieren aussergewéinlech gutt erhale Bauerenhäff gewiescht. Si waren iwwer 200 Joer al. Dofir waren d'Haiser, déi unenee louchen och klasséiert ginn, dat eréischt d'lescht Joer.

Et ginn 2 Kategorie fir ze klasséieren: Monument national an Inventaire supplémentaire. Bei der zweeter Kategorie kann de Proprietaire decidéieren ze verkafen, de Kulturministère kann awer bannent 30 Deeg soen "Nee, dat geet net" an en hätt d'Baugenehmegung hei zum Beispill kéinten annuléieren, seet de Jochen Zenthöfer. Et goufe vill Interventiounen. Do waren eigentlech och positiv Signale komm. Trotzdem wier dunn bemol ganz séier ofgerappt ginn, fir "Fakten" ze schafen.

De Jochen Zenthofer schwätzt vun engem eventuelle Präzedenzfall. All déi aner 700 Gebaier, déi um Inventaire stinn, wieren elo a Gefor. Déi 2 Organisatioune fuerderen, datt all d'Gebaier, déi den Ament Inventaire supplémentaire sinn, als Monument national ëmklasséiert ginn.

Guy Arendt: E Kulturminister oder e Kultur-Staatssekretär annuléiert keng Genehmegung vun engem Buergermeeschter

De Staatssekretär am Kulturministère Guy Arendt léisst d’Kritike vun der Asbl "Sauvegarde du patrimoine" net gëllen. Nodeems de Kulturministère e Bréif krut, goufen d’Gemeng an d’Proprietaire kontaktéiert an do wier de Wëllen net do gewiescht, d’Gebaier ze erhalen.

Guy Arendt


Et hätt een natierlech d'Méiglechkeet gehat, et op de Monument national ze klasséieren, mä da wier ze vill héich geschoss ginn, esou de Guy Arendt. Senger Meenung no wier et un der Gemeng gewiescht, dat Ganzt iwwert de PAG ze schützen. E Kulturminister oder e Kultur-Staatssekretär hätt och net d'Méiglechkeet, eng Genehmegung vun engem Buergermeeschter z'annuléieren.

Och beim Beggener Wichtelhaus wier een an enger ähnlecher Situatioun gewiescht. Do hätt een awer méi spéit mam Promoteur an de Proprietairen eng gemeinsam Léisung fonnt, esou nach de Guy Arendt.

Äre Commentaire


D'Commentairë gi gelueden, ee Moment w.e.g.!
Sollten se net geluede ginn, hutt der wahrscheinlech een AdBlocker laafen, deen se blockéiert. Dir misst en dann sou astellen, dass en eisen Site net méi komplett blockéiert.