Servais-Präis 2011 fir Jean Krier fir 'Herzens Lust Spiele'

Literatur: E Freideg den Owend gouf de Jean Krier fir säi Gedichtband 'Herzens Lust Spiele' mam Servais-Präis 2011 ausgezeechent.

De Lëtzebuerger Lyriker Jean Krier (Joergank 1949).© Robert Bosch Stiftung / Yves Noir
De Servais-Präis feiert dëst Joer e ronnen 20. Gebuertsdag.

E Freideg den Owend gouf de Jean Krier am Mierscher Literaturhaus also mam 20. Servais-Präis ausgezeechent.

D’Ried huet de renomméierten däitsche Literaturkritiker Michael Braun gehalen, de Jean Krier huet Extraiten aus „Herzens Lust Spiele“ gelies. D’Musek fir d’Feier war vum Alex Müllenbach, e fréiere Schoulfrënd vum Jean Krier, dee verschidde Gedichter vum Auteur vertount huet.

De Prix Servais gëlt als dee renomméiertste Lëtzebuerger Literatur-Präis. Zënter 1992 gëtt en all Joer op Propose vun enger onofhängeger Jury fir dat "bescht" literarescht Wierk aus dem Joer virdru verginn. En ass mat 4.000 Euro dotéiert.

Eng 140 nei Texter hunn d’Membere vum Servais-Präis-Jury déi Kéier studéiert. An zwar net nëmmen op Lëtzebuergesch, ma an alle Sproochen, di hei am Land praktizéiert ginn. Den Auteur kann och en Auslänner sinn, deen hei am Land doheem ass, oder awer e Lëtzebuerger, deen am Ausland lieft, sech awer ëmmer nach als Lëtzebuerger Schrëftsteller versteet.

Dem Jean Krier säi Gedichtband "Herzens Lust Spiele" an däitscher Sprooch ass am Verlag poetenladen vu Leizpig erauskomm.

An der Jurybegrënnung fir de Präis 2011 heescht et:

Der Gedichtband Herzens Lust Spiele von Jean Krier wird mit dem Prix Servais 2011 ausgezeichnet. Die Jury ehrt damit den in Zyklen komponierten Band mit deutschsprachigen und überwiegend in Langversen und in fragmentierter Syntax geschriebenen Prosagedichten, die durch Entlehnungen aus der europäischen Literatur, aus den Mythen und aus der Alltagssprache komplexe, polysemische und doch unverkennbar eigene Zeichensysteme entwerfen. Die Freilegung sprachlicher Schichtungen offenbart dabei eine berührende Authentizität sowohl der Reflexionen über als auch der Erfahrungen von Selbsterkundungen, Reisewahrnehmungen, Krankheitsleid und Todesahnung. Die Lakonik des persönlich-existentiellen Angstschreis und die Epiphanie des vermeintlich Rätselhaften, des Ominösen und Unerklärbaren charakterisieren Jean Kriers Gedichte in Herzens Lust Spiele.



An der Jury fir de "Prix de la Fondation Servais 2011" sinn: Claude D. Conter (President), Alexandra Fixmer, Maisy Hausemer, Pierre Mergen, Jeanne Offermann, Alex Reuter, Marie-Paule von Roesgen, Marie-Jeanne Wagner a Jacques Wirion.



Wien huet de "Prix de la Fondation Servais" bis elo kritt?

• 1992: MANDERSCHEID Roger
• 1993: GREISCH Pol
• 1994: PORTANTE Jean
• 1995: KOHNEN Joseph (Prix Spécial)
• 1996: JACOBY Lex
• 1997: STECKEL Margret
• 1998: ENSCH José
• 1999: HOSCHEIT Jhemp
• 2000: SCHMOETTEN Pol
• 2001: HARSCH Roland
• 2002: HELMINGER Guy
• 2003: SORRENTE Jean
• 2004: MUNO Claudine
• 2005: JACOBS Jean-Paul
• 2006: REWENIG Guy
• 2007: SCHLECHTER Lambert
• 2008: KOLTZ Anise
• 2009: SAX Pol
• 2010: Guy Rewenig (Tania Naskandy)

 

De Jean Krier...

De Jean Krier ass 1949 zu Lëtzebuerg op d’Welt komm, hien huet zu Freiburg Germanistik an Anglistik studéiert a bis viru kuerzem hei am Land am Lycée däitsch enseignéiert. Ma do dernieft ass de Jean Krier Lyriker. Zanter de 1980er Joeren, si seng virtuos arrangéiert Gedichter an däitsche Literaturmagazinner, zanter 1995 och vun däitschen Editeuren als Poesie-Bänn publizéiert ginn. Zejoert ass d’Wierk „Herzens Lust Spiele“ beim Verlag „Poetenladen“ zu Leipzig erauskomm.

Dofir ass de Jean Krier dëse Mäerz mam renomméierten a mat 15.000 Euro dotéierten Adelbert-von-Chamisso-Präis zu München ausgezeechent ginn, an zwar e.a. mat der Begrënnung „seine Gedichte sind Sprachkritik und Fest der Sprache zugleich“. De Präis gëtt zanter 1985 vun der Robert-Bosch-Stëftung verdeelt, fir grouss literaresch Leeschtungen an der däitscher Sprooch vun Auteuren, deenen hir Mammesproch net Däitsch ass oder déi een anere kulturellen Hannergrond hunn. De Lëtzebuerger Dichter huet d'Jury mat sengem Wierk "Herzens Lust Spiele" iwwerzeegt, wellt et déi däitschsproocheg Lyrik "op originell a beandrockend Aart a Weis" géif beräicheren.

An e Freideg den Owend krut den Auteur also och eisen nationale Servais-Präis am Mierscher Literaturarchiv iwwerreecht. De Jean Krier mengt net, dat seng Gedichter dowéinst an Zukunft d’Welt verännere wäerten, ma di 2 Präisser huet hien awer mat Freed entgéint geholl, well et a sengen Aen, Präisser fir d’Lyrik sinn.

 AUDIO: Extrait Jean Krier. »

Extraiten aus dem Wierk „Herzens Lust Spiele“ fannt Dir am Internet op  www.poetenladen-der-verlag.de. Informatiounen iwwert den Auteur op www.literaturarchiv.lu 


Är Commentairen - Netikett


D'Commentairë gi gelueden, ee Moment w.e.g.!
Sollte se net geluede ginn, hutt der wahrscheinlech een AdBlocker lafen, dee se blockéiert. Dir misst en da sou astellen, dass en eisen Site net méi komplett blockéiert.