Déidlech Schëss zu BounewegOch d'Police vu Bitburg huet nom Hollänner gesicht

D'Enquête läit bei der Inspection Générale vun der Police an déi rifft d'Zeien, déi sech nach net gemellt hunn, op, si ze kontaktéieren.

Déi däitsch Police vu Bitburg hat RTL-Informatioune no déi Lëtzebuerger Police ëm Hëllef gebieden, fir nom Hollänner ze sichen, dee virun enger décker Woch zu Bouneweg erschoss ginn ass.

Den Nico Graf mécht de ganz virleefege Point an dëser Affär.

Bouneweg Suivi mat Bitburg / Reportage Nico Graf

Eng Affär, déi e vläit opdeele muss an dräi Partien: Wat war am Virfeld lass, wat ass an der Ardenner-Strooss zu Bouneweg geschitt a wat ass ganz um Enn geschitt.

Der Rei no:

D'Police vu Bitburg hat hir Lëtzebuerger Kollegen op e Mann opmierksam gemaach, deen déi jo souwisou scho kannt huet. Den 51 Joer ale Hollänner, deen an der Gemeng Koerperich an der Eifel gewunnt huet. Déi Bitburger haten de Lëtzebuerger gesot, si géifen nom Hollänner sichen, dee wier mat dem bekannte schwaarze Mercedes mat Lëtzebuerger Plaquen ënnerwee. An deem Sënn hu si bei hire Kollegen zu Dikrech ugefrot. Problem do: schrëftlech ass dat zu Dikrech eréischt agaang, wéi den Hollänner schonn e pur Stonne laang dout war. Ob do eng mëndlech Demande scho virdrun komm war, ass net gewosst.

Bekannt ass awer, datt den Hollänner mëttwochs mëttes mat sengem delabréierte Mercedes duerch Bouneweg gedréit ass. Do ass hien géint 14.45 Auer dem Carlo Maller opgefall, well den Auto nawell vill Kaméidi gemaach huet:

Du hunn ech vun der Route de Thionville hier, vu wäitem, e Geräisch héiere kommen. Du kucken ech an du gesinn ech e Mercedes do fueren. Do hunn ech mer geduecht, da kucks de awer elo emol, wouhin dee fiert. An du kucken ech dorobber an du fiert hien iwwer déi lénks Spur an d'Rue de Hesperange eran. Do fiert hien hei laanscht bis bei de Rond-point beim Foyer an du fiert hie riets nees erof an d'Rue des Ardennes. Du koum hien d'Rue Sigismond nees eropgefuer, fir den Tour nees ze maachen, fir erof. Du hunn ech awer gesinn, datt de Mann just riichtaus gekuckt huet, wéi wann e Suergen oder Problemer oder ech weess net wat hätt.

Et ass dat bekannte Suerge-Gesiicht vum Hollänner, dat schonn aner Zeien beschriwwen hunn. De Carlo Maller ass du en Espresso drénke gaangen.

Du gesinn ech awer vum 15.45 Auer e Policeauto, deen do erop gefuer ass, duerch d'Rue Sigismond. Du ass de Mercedes awer schonn eng Stonn hie gefuer. Also dat verstinn ech net. Firwat fiert deen nach eng Stonn?

Dat géif ee jo gär wëssen. War de Mann op der Sich no Drogen oder wollt hien der verkafen, do am Quartier, oder war soss eppes lass?

Egal. Kuerz drop probéiere jo Polizisten, fir hien unzehalen an ze kontrolléieren. Et kënnt an der Ardenner-Strooss zu enger course-poursuite, mat getéitschten Autoen an et kënnt zum Blockage, et kënnt, seet d' Police,zur Noutwier-Situatioun an um Enn zum finale Schoss. Den Hollänner aus der Eifel ass dout. Mä wéi vill Schëss si wierklech gefall? Dräi um Enn oder der dräi, wéi e Polizist zu Fouss dem Mercedes an der Ardenner-Strooss nogelaf ass? Dat hu jo Zeien eise Kollege vun der Tëlee gesot. An do gëtt et wuel och en Zeien, dee vun zwee Schëss ganz um Enn vun allem schwätzt. Et wier also am ganze 5 Mol geschoss ginn. A wat fir ee Schoss war deenen déidlechen?

Zeie beschreiwen den Tëschefall zu Bouneweg

Tëschefall vu Bouneweg aus der Siicht vun Aenzeien (19.04.2018)
Opgefall war de Mann, well säi Gefier op der rietser Säit beschiedegt war.


De Mann, deen de leschte Mëttwoch déidlech vun enger Policekugel getraff gouf, sou steet et am Communiqué vum Parquet, war een 51 Joer alen hollännesche Staatsbierger, deen an Däitschland gewunnt huet. Hie wier der Police hei am Land generell bekannt gewiescht, dat wéinst Infraktiounen am Verkéier an en hätt e Fuerverbuet gehat.

Opgefall wier de Mann der Police dann och de leschte Mëttwoch, wéinst dem Zoustand vu sengem Gefier. E schwaarze Mercedes, dee virum Virfall schonn op der rietser Säit getéitscht war, sou en Aenzeien. Wéi d'Beamten de Chauffeur um leschte Steiwer wollten zur Ried stellen, rennt dee mat sengem Mercedes fort.


Den Auto koum aus der Richtung vun der Rue Dernier Sol an de Rond-point eragefuer. Op der rietser Säit war beim Pneu schonn alles futti, well en héchstwahrscheinlech schonn an eppes gerannt war. Dunn ass hien an d'Rue des Ardennes erofgefuer. Deen Ament, wou en erofgefuer ass, huet en eng wäiss Camionnette, déi do geparkt stoung, mat ewech geholl gehat, op der rietser Säit. Deen Ament wou en dunn ofgebéit ass, koum e Policebeamten, dee queesch iwwert de ganze Parking gelaf war, fir dem Auto hannendrun ze lafen. Ganz kuerz drop, héchsten 15 Sekonnen oder esou, hunn ech 3 Schëss héieren, esou en éischten Aenzeien.

Am Fong wollt de Polizist den Auto unhalen, fir en ze kontrolléieren, mä deen ass awer net stoe bliwwen. An du wollt hien de Polizist iwwerrennen, erkläert en zweeten Aenzeien.

Gouf du schonn eng éischte Kéier op hallwer Héicht tëscht Rond-point a Rue Sigismond geschoss?

Ech hunn als éischt e mega Pneuequietschen héieren, esou eng weider Zeien. Du sinn ech erausgelaf, fir ze kucken, wat lass war an dunn hunn ech gesinn, wéi e Polizist vun der enger Stroossesäit op déi aner gelaf ass. An e puer Sekonnen drop hunn ech direkt 3 Schëss hannerteneen héieren.

Dat eenzegt, wat ech matkritt hunn, ass dass do en Auto komm ass an dunn hei an de Bam geknuppt ass. Ech hunn awer net gesinn, datt en an e Flick geknuppt soll sinn. [...] Dono hunn ech awer net méi gesinn, wat geschitt ass, ech hu just nach 3 Schëss [héieren],
beschreift e weidere Mann d'Situatioun.


Op der Héicht vun der Kräizung Rue des Ardennes, Rue Sigismond kënnt et zum Face à Face tëscht dem schwaarze Mercedes an engem Gefier vun der Police. De Chauffeur op der Flucht fiert eng éischte Kéier op de Policeauto duer, fiert zeréck, hellt nees Ulaf a fiert weider, laanscht de Police Won.

De schwaarze Mercedes sträift eng Fassade, a rennt op der Platz virun der Bouneweger Kierch an e Bam. Gëtt hei nach emol geschoss? Jo seet een Aenzeien: zwee Mol souguer!

D'Enquête an den Hänn vun der Inspection Générale vun der Police leeft.

An de Message ass kloer: all Zeien, déi sech bis elo net gemellt hätten, solle Kontakt mat der Police ophuelen.

D'CSV huet dann dësen Donneschdeg gefrot, dass wéinst den Evenementer vu Bouneweg a vun der N7 de Policeminister an de Justizminister an déi zoustänneg Chamberkommissioune kommen, fir ze diskutéieren, wei d'Police an hirer Aarbecht besser kann ënnerstëtzt ginn a wéi besser ka bei sou Virfäll communiquéiert ginn.

PDF: D'Demande de convocation d'une réunion jointe vun der CSV