Opmaache vum StaatsdéngschtCGFP steet der Iddi vum Minister Kersch kritesch géintiwwer

Wéinst dem Personalmanktem beim Staat schwieft dem Minister vir, de Staatsdéngscht méi fir Net-Lëtzebuerger opzemaachen an den Examen ze reforméieren.

D'CGFP ass mam Minister Kersch d'Accord, datt de Rekrutéierungsproblem beim Staat muss geléist ginn. D'Approche vum Minister, d'Posten och fir Net-Lëtzebuerger opzemaachen, gesäit d'Gewerkschaft awer kritesch. Et soll een  emol iwwer aner Weeër probéieren, de Problem ze léisen.

Opmaache Staatsdéngscht, Reaktioun CGFP/Rep. Eric Ewald



Wéi den Dan Kersch en Donneschdeg de Moien am RTL-Interview sot, géif donieft, zesumme mat der CGFP un enger Reform vum Staatsexame geschafft ginn, an deem ze vill Kandidaten duerchfale géifen. Am Exame sollte geziilt déi Inhalter ofgefrot ginn, déi beim Staat gebraucht ginn, sou de Minister. Dës Reform soll bis d'nächst Joer stoen.

D'Staatsbeamtegewerkschaft steet deenen Iddie positiv géintiwwer, wéi hire Generalsekretär en Donneschdeg de Moien an enger 1. Reaktioun betount huet.

De Problem vum Recrutement z.B. wär manner drop zréckzeféieren, dass een net genuch Kandidaten hätt, wéi villméi dorop, dass der eben ze vill duerchfalen. Bei enger Reform vum Staatsexame misst deem entgéint gewierkt ginn, seet de Steve Heiliger, deen donieft drun erënnert, dass, wat d'Opmaache vun der Fonction Publique fir Net-Lëtzebuerger ugeet, déi schonn zanter 2009 Realitéit ass.

Fir de Moment schaffe ronn 10 Prozent Net-Lëtzebuerger an der Fonction Publique, bei der CGFP bleift een awer der Meenung, dass all déi Domainer, déi Puissance Publique sinn, vu Lëtzebuerger solle wouer geholl ginn. Dat wär och am Ausland de Fall, sou de Steve Heiliger. Et ass ee bei der CGFP dann och der Meenung, dass wann een de Recrutéierungsproblem ugeet an de Staatsexame reforméiert gëtt, ee genuch Leit an Zukunft wäert fannen.   

Dass dem zoustännege Minister no d'Lëtzebuerger Nationalitéit deemno keng sou wichteg Konditioun méi wär, d'Lëtzebuerger Sprooch dogéint schonn, fënnt d'Ënnerstëtzung vun der CGFP. De Generalsekretär schwätzt op deem Punkt vun Deckungsgläichheet.

De Staatsexamen da soll, wann et dem Steve Heiliger no geet, a Rapport si mat deem, wat e Staatsbeamten dono mécht. Et géif virun allem beim Allgemengwësse vill Echecke ginn, wat misst adaptéiert ginn. Et géifen digitaliséiert Modeller vun Examen am Ausland existéieren, déi ee kéint an d'A faassen. Der CGFP ass et wichteg, dass de Staatsdéngscht mat de beschte Leit fonctionnéiert an dat am Interêt vum Land.

RTL-NEWS: Invité vun der Redaktioun (16. November) - Dan Kersch: Staatsdéngscht méi op fir Auslänner a Reform vum Examen

Äre Commentaire


D'Commentairë gi gelueden, ee Moment w.e.g.!
Sollten se net geluede ginn, hutt der wahrscheinlech een AdBlocker laafen, deen se blockéiert. Dir misst en dann sou astellen, dass en eisen Site net méi komplett blockéiert.