VIDEO: Rosa-Uniform-BemierkungMarc Spautz entschëllegt sech, Rosa Lëtzebuerg entsat

En Dënschdeg den Owend war zu Esch den Ofschloss vun de Bezierkskongresser vun der CSV am Süden, an do war dem Marc Spautz eng Bemierkung erausgerutscht...

CSV-Süden: Nees an d'Verantwortung an de Premier stellen (07.02.2018)
En Dënschdeg den Owend war zu Esch den Ofschloss vun de Bezierkskongresser vun der CSV am Süden.

No Walfer e Méindeg war dat natierlech nach méi e staarkt Symbol fir de Wiessel, déi fréier rout Héichbuerg, déi elo fest an den Hänn vun de Chrëscht-Sozialen ass. De Kär-Message war net anescht ewéi am Zentrum: CSV wëll nees an d'Verantwortung an de nächste Premier stellen, mee d'Ambiance, déi war schonn anescht an och d'Viviane Reding war mat dobäi.

D'Viviane Reding, d'Fra, déi der Partei Stëmme bréngt, mee och vill Kappzerbrieches. Am Zentrum kéint se dem Spëtzekandidat Schied maachen an am Süden dem President. Soss war um Dënschdegowend villes anescht. Ugefaang mam Decor vun der Kufa, soss eng Bühn fir alternativ Artisten, en Dënschdeg eng Bühn fir vill deels euphorescht Selbstluef.

Tom Bleyer, Sektiounspresident CSV Esch:  Léif Alleguer, de 14. Juli 1789 ass zu Paräis d'Bastille gestierzt ginn, den 8. Oktober 2017 zu Esch d’'Place de l'hôtel de ville. 

De Motto ass "Mir erueweren och de Staatsministère zréck" an ëmmer nach: Gambia wëll virop der CSV schueden.

Felix Eischen, Bezierkspresident CSV Esch: Dat hëlt awer heiansdo zimlech abstrus Zich un, wann der e bëssen uecht gitt, esou wéi d'Rieden an der Plenière, da gesitt dir, dass ganz vill markéiert sinn duerch e wéineg fundéierten CSV-Bashing. Ons kann et Recht sinn.

Trotz all Harmonie gëtt et intern Konflikter. Och am Süden ass CSJ rebellesch a rosen, well net genuch jonk Kandidaten op de Lëschten ze fanne sinn.

Yannick Glod, Generalsekretär CSJ: Wann ee sech Fotoen ukuckt vun de Kandidaten, déi op der Homepage vun RTL courséieren, war d'Majoritéit vun den designéierte Kandidate schonn 2013 derbäi, gesäit esou en Erneierungsprozess aus?

Bal net ze bremsen a sengen Elan war de Parteipresident Marc Spautz. Zu deem senge Liiblingsgéigner d'Corinne Cahen, de Claude Meisch an den Dan Kersch gehéieren, déi hie schaarf attackéiert huet an deenen hir Politik d'CSV wéilt Réckgängeg maachen.

Am meeschten attackéiert, an dat och ënnert der Ceinture, huet de Marc Spautz awer den Etienne Schneider, och als Policeminister.

Marc Spautz, President CSV: Op hir Autoe lo schéi sinn oder net, do ka jiddereen denke wat e wëll, op se lo och nei Uniforme kréien, déi rosa sinn oder net, do kann och jiddereen denke wéi e wëll.

De Walkampf wäert weisen, ob et Minetter vun der Long op Zong am Kontrast zum Stater Language ass, oder eng Aarbechtsdeelung an der CSV tëscht méi staatsmännesche Spëtzekandidaten an dem President, deen d'Attacke reit.

Nëmmen een Dag méi spéit d'Entschëllegung
Op Facebook entschëllegt sech de Marc Spautz um Donneschdeg fir eng Bemierkung déi him um CSV Südkongress „erausgerutscht“ wier.

Ausso vum Marc Spautz iwwer rosa Uniformen



Op Facebook schreift de President vun der CSV elo, hie géif dës Bemierkung bedaueren, dat wier net seng Astellung. Hie géif sech entschëllegen, hien hätt e Feeler gemeet an dat géif him leed dinn.





RTL-NEWS: VIDEO: CSV-Bezierkskongress Zentrum: Claude Wiseler gëtt sech bewosst staatsmännesch

Schreiwes vu Rosa Lëtzebuerg: zudéifst entsat an extrem rosen
Hei d'Reaktioun vu Rosa Lëtzebuerg "op dem CSV Parteipresident Marc Spautz seng inakzeptabel verbal Entgleisungen en Dënschdeg den Owend zu Esch beim Ofschloss vun de Bezierkskongresser vun der CSV am Süden."

PDF: Schreiwes vu Rosa Lëtzebuerg.

Mat dësem Schreiwes erkläre mir eis zudéifst entsat an extrem rosen iwwert déi diskriminéierend an homophob Referenz vum CSV Parteipresident Marc Spautz op d'sexuell Orientéierung vum Här Minister Etienne Schneider.

Deen immens schlechten an deplacéierte „Witz" iwwer rosa Uniforme vum Här Spautz war gläichermoossen ignorant, respektlos, jugéierend a beleidegend fir all homosexuell-e Matbierger-in a fir déi ganz LGBTIQ Communautéit zu Lëtzebuerg am allgemengen. Hei brauch een och guer net ze versichen d'Saach schéin ze schwätzen oder soss ze banaliséieren. Hei gouf op allerdéifstem Niveau den Uz, net mat engem abstrakte Sujet gemaach mä mat Mënschen déi och 2018 zu Lëtzebuerg nach ëmmer reegelméisseg mat Viruerteeler a Problemer an hirem respektiven Alldag ze kämpfen hunn. Dëst war net nëmmen en direkte Schlag an d'Gesiicht fir eis ganz Communautéit mä bedeit och Fudder a Bestätegung fir all homophob Idioten dobausse fir eis all Dag op 1000 verschidden Aart a Weisen dierfen ze diskriminéieren. Wéi muss sech wuel e jonke Mënsch fillen deen sech grad entdeckt a nach voller Zweiwel an Ängschten ass, wa grad e fréiere Familljeminister esou verbal entgleist?

Huet den Här Spautz da guer kee Bewosstsinn iwwert dee vernichtenden Impakt deen esou bëlleg Witzer grad op déi Jéngst an déi Schwächsten innerhalb vun enger Minoritéit kann hunn? Oder ass et him einfach egal? Dat nächst Joer schreiwe mer de ronne Gebuertsdag vu 50 Joer Homosexuellebeweegung. Dat ware bis dato 49 Joer gefëllt mat Millioune vun individuelle Liewensgeschichten déi allzedacks geprägt ware vu Leed, Tréinen a Misär. Dat waren awer och 49 Joer voller Kampfgeescht, Courage a Motivatioun fir eis Welt e Stéck méi gerecht an egalitär ze gestalten.

Alles dat gouf en Dënschdeg den Owend mat engem eenzege rosa Witz mat Féiss getrëppelt. 49 Joer Sensibiliséierung an Opklärung einfach ausgelaacht. Dat ganzt huet zuguer nawell och säin Applaus fonnt. Ass dat wierklech de Punkt wou mer 2018 ukomm sinn? Mir soe kloer NEEN! De Schued ass ugeriicht an d'Konsequenzen droe mir als Communautéit nees, fir weider Wochen a Méint an heiansdo Jorelaang. An deem Sënn konnt Är Entschëllegung op Facebook eis beim beschte Wellen och net wierklech iwwerzeegen. Mir waren, sinn, a bleiwen Aktivisten, Här Spautz, an zwar esou laang bis et Spréch ewéi dee vun Iech keng méi ginn!

De Verwaltungsroot vu Rosa Lëtzebuerg

 

Är Commentairen - Netikett


D'Commentairë gi gelueden, ee Moment w.e.g.!
Sollten se net geluede ginn, hutt der wahrscheinlech een AdBlocker laafen, deen se blockéiert. Dir misst en dann sou astellen, dass en eisen Site net méi komplett blockéiert.