Sträit ënner FlüchtlingenCorinne Cahen zur Flüchtlingspolitik: Kloer Wierder

Déi Leit, déi de System ausnotzen, hunn am Grand-Duché näischt verluer, sou d'Ministesch.

© RTL (Archiv)

Déi Flüchtlingen, déi en Donneschdeg an de Foireshalen openee lassgaange waren an domat e gréissere Policeasaz ausgeléist haten, hunn hei am Land näischt verluer a mussen an déi Länner ausgewise ginn, wou si fir d'Éischt registréiert goufen. 12 Leit wieren no de brutalen Ausenanersetzungen an d'Wanteraktioun gefouert ginn, fir d‘Familljeclanen ze trennen. Do géifen se awer net higehéiere, sot d'Corinne Cahen am RTL Interview.

LINK: No Sträit ënner Flüchtlingen: Police saiséiert geféierlech Géigestänn an der Luxexpo

Corinne Cahen: Déi richteg Plaz fir déi Leit do ass nees an déi Länner geschéckt ze ginn, wou si hire Fingerprint gemaach hunn. Et si quasi alleguer Dubliner, dat heescht, där déi schonn enzwousch anescht, an engem anere Land, d'Demande d'Asyl gemaach hunn. An dofir mussen déi elo esou séier wéi méiglech zeréck geschéckt ginn. Hir Plaz ass am Fong net hei zu Lëtzebuerg, hir Plaz ass do, wou si hir Asyldemande gemaach hunn. Och wa se vläicht weder do nach hei iergendwéi eng Erfollegschance hunn, fir iwwerhaapt Asyl ze kréien. Mä déi Leit hunn am Fong näischt hei verluer an dofir musse si esou séier wéi méiglech d'Land nees verloossen.

Extrait Corinne Cahen (1)

Dat seet d'Ministesch, huet awer ganz kloer betount, dass Krichsflüchtlingen, déi zum Deel alles verluer hunn, hei am Land missten opgeholl ginn. Fir sech dës Moyene kënnen ze schafen, misst ee kucken, dass Migranten, déi nëmmen de System ausnotzen, guer net bis hei hinner kéinte kommen.

Corinne Cahen iwwer Flüchtlingen / Reportage Ben Frin



Corinne Cahen: Déi reesen einfach emol vu Land zu Land. Dat si Leit aus Albanien, Algerien, Tunesien, aus dem Marokko, aus der Tierkei, souguer aus dem Kosovo. Iwwerall Länner, wou et de Leit vläicht net esou gutt geet, mä wou sécher am Moment kee Krich ass. Déi och iwwerhaapt keng Chance hunn, fir kënnen heizebleiwen. An do musse mer als Europa virun allem kucken, datt mer eis elo emol endlech an Europa och d'Moyene ginn, fir dat déi Leit et iwwerhaapt net mi bis heihinner packen. Well et sinn am Fong déi, déi eis Misär maachen, net nëmmen zu Lëtzebuerg.

A wann esou Leit et dann awer bis hei hi gepackt hätten, wier et um Immigratiounsministère, fir d'Ausweisung ze organiséieren.

Corinne Cahen: Deen do muss kucken, datt déi Leit esou séier wéi méiglech nees fortgeschéckt ginn. An dofir hoffe mir och, datt dëst esou séier wéi méiglech ka geschéien, dass se nees fortgeschéckt ginn.

RTL.lu mat Commentairen: „Mir mussen eis Asylpolitik iwwerdenken“ - Nicolas Schmit wëll Changement an ass prett fir an d'Wahlen

Iwwerraschend däitlech Wierder vun der Ministesch, decken déi sech mat deem, wat och schonn den Aarbechtsminister Nicolas Schmit gesot huet?

Corinne Cahen: Dem Nicolas Schmit seng Denkweis a meng si genau déi selwecht, an dat scho ganz laang. An et si ganz vill anerer an der Regierung, déi dat och esou gesinn, fir net ze soen, alleguerten. Mir sinn eis alleguerte bewosst, datt wa mer Leit wëllen hëllefen, déi an Nout sinn an déi wou hëllef brauchen, do muss een natierlech och kucken, datt ee sech d'Moyene gëtt, fir deenen ze hëllefen.

Extrait Corinne Cahen (2)