An 100 Sek. erkläert - Centenaire ArmisticeVirun 100 Joer gouf dem 1. Weltkrich en Enn gemaach

8 Männer an engem Eisebunnswaggon am Bësch vu Compiègne: Dat war de Kader vun der Signature vum Waffestëllstands-Accord haut viru genee 100 Joer.

Um Dësch an Nordfrankräich souze fir d'däitsch Truppen ënnert anerem den Detlof von Winterfeldt a fir d'Alliéiert de franséische Maréchal Foch. Bal 20 Milliounen Zivilisten an Zaldote sollten an de Krichsjoren tëscht 1914 an 1918 ëmkommen oder sinn zanterhier vermësst. Compiègne ass e Stéck lieweg Geschicht, wou e Samschdeg jo och de President Macron an d'Kanzlerin Merkel un déi Doudeg erënnert hunn.

Centenaire Armistice an 100 Sekonnen: Rep. Roy Grotz



Op 5minutes.lu: La Première guerre mondiale en dix moments clefs



D'Zaldoten op allen Frontlinne ware midd, néiergeschloen a wollten nëmmen nach heem - d'Fréijoersoffensiv vun den däitschen Truppen huet nëmmen Doudeger gefuerdert, et gouf ee sech eens, datt de Krich net méi konnt gewonne ginn.



D'lescht Offensiv vun den alliéierten Truppen huet den 8. August 1918 bei Amiens ugefaangen a sollt bis den 11. November daueren. Schonn Enn September hat den däitschen État-Major d'Politiker zu Berlin gefrot, fir en Armistice auszehandelen, dat op Basis vum Plang vum US-President Wilson.

Dee richtege Waggon 1926 zu Paräis, wou en nom Krich hi bruecht gi war.


3 Deeg laang gouf am Eisebunns-Waggon beim Stiedche Rethondes verhandelt - woubäi dat e grousst Wuert ass, wëll däi däitsch Delegatioun gehale war, dat z'acceptéieren, wat virgeluecht gouf.

Loftopnam vun der Bëschwiss, wou den Armistice viru genee 100 Joer ënnerschriwwe gouf.© AFP


De Foch selwer war wärend de Verhandlunge perséinlech guer net op der Plaz - iwwerdeems koume weider Zaldote bei de Frontlinnen tëscht Marne a Meuse ëm.

Esou gouf virun 100 Joer zu Paräis d'Enn vum 1. Weltkrich gefeiert.


Géint 20 op 5 moies gouf um 11. November dunn den Armistice signéiert, deen ënnert anerem de Réckzuch vun den däitschen Truppen aus Lëtzebuerg, der Belsch, Frankräich an der Alsace-Lorraine bannent 14 Deeg virgesinn huet. Och hu missten eng 1.700 Fligeren, 5.000 Lokomotiven an 150.000 Eisebunnswaggonen ofgestouss ginn.

D'Trêve ass den 11.11. um 11 Auer moies a Kraaft getrueden - net vill wëssen, dass den Accord 3 Mol huet misse verlängert ginn, eng leschte Kéier am Februar zu Tréier.

Déi wichtegst Ënnerschrëfte goufen awer am Waggon am Bësch bei Compiègne gemeet - iwwregens den ëmgebaute Waggon vum Maréchal Foch. 1945 gouf d'historescht Gefiert, dat den Hitler an Däitschland iwwerfouert hat, iwwerdeems vun der SS zu Crawinkel a Brand gestach, wéi d'US-Truppen avancéiert sinn.



Nogebaut: Op der Bëschwiss vu Rethondes steet de "vrai-faux wagon de Foch" ...


Compiègne, d'Plaz, wou den Armistice besigelt gouf, ass iwwregens zanter 1964 och d'Partnerstad vu Veianen.

D'Titelbild vum Lëtzebuerger Wort vum 11. November 1918 op www.eluxemburgensia.lu


D'Titelbild vum Tageblatt vum 11. November 1918 op www.eluxemburgensia.lu


Feierlechkeete fir de Centenaire zu Paräis an zu Lëtzebuerg
Zu Paräis ginn e Sonndeg eng 70 Staats- a Regierungscheffen erwaart, fir de Centenaire vum Armistice vum 1. Weltkrich ze feieren.

Op 5minutes.rtl.lu: Armistice: grand-messe internationale pour la paix à Paris

Frankräich erënnert mat enger Feier vun de Superlativen un d'Enn vun der "Grande Guerre". Staats- a Regierungscheffen aus 70 Länner sinn zu Paräis derbäi - ënnert anerem den US-President Trump, déi däitsche Kanzlerin Merkel, de russesche President Putin an och den tierkesche President Erdogan. Fir Lëtzebuerg ass déi groussherzoglech Koppel bei de Feierlechkeeten derbäi an och de Premier Xavier Bettel.

Den Héichpunkt ass e Sonndeg de Moien eng Zeremonie vu gutt enger Stonn beim Arc de triomphe. Als Zeeche vun der Versöhnung sollen all d'Spëtzepolitiker symbolesch eng Hand op d'Schëller vum Noper leeën. Um 11 Auer wäerten a Frankräich all d'Klacke lauden, géint 13.30 Auer da weltwäit.

Hei zu Lëtzebuerg ass e Sonndeg am spéide Mëtteg eng Zeremonie fir de Centenaire vum Armistice. Dat ass um 16.30 Auer bei der Gëlle Fra an der Stad, a Präsenz vum Grand-Duc an der Grande-Duchesse. De Premier Xavier Bettel hält och eng Ried.

Am 1. Weltkrich sinn tëscht 1914 an 1918 bal 9 Milliounen Zaldoten an iwwer 6 Milliounen Ziviliste gestuerwen. De Waffestëllstand – den Armistice – ass den 11. November 1918 an der Géigend vu Compiègne am Norde vu Frankräich ënnerschriwwe ginn.




Är Commentairen - Netikett


D'Commentairë gi gelueden, ee Moment w.e.g.!
Sollte se net geluede ginn, hutt der wahrscheinlech een AdBlocker lafen, dee se blockéiert. Dir misst en da sou astellen, dass en eisen Site net méi komplett blockéiert.