RIPDP-Politiker Niki Bettendorf am Alter vun 81 gestuerwen

De fréieren Buergermeeschter vu Bartreng ass e Samschdeg am Alter vun 81 Joer gestuerwen. Hie war zanter November am Palliativ-Zenter Omega.

© Foto vum Site vun der aabbl.lu

Den DP-Politiker a gebiertege Bieleser, war vun 1982 bis 2001 Gemengepapp vu Bartreng.

Vu Juni 1990 un, war hien Deputéierten an der Chamber, seng Demissioun hat hien am Oktober 2006 agereecht. Säi Successeur do war den Alexandre Krieps. 

En Noruff vun der AABBL (Association des Anciens du Basketball Luxembourgeois A.S.B.L.)

Den Niki Bettendorf ass hennt friddlech entschlof. All wou den Niki kannt hun, hun hien geschätzt als Mensch deen en groussen Don hat dass jidfereen wou mat him bei der enger oder aanerer Gelegenheet zesumme war, vun senger Waarmherzechkeet, senger Hëllefsbereetschaft a sengen Rotschléi a villen Hinsichten gestärkt erausgange sin.

Den Niki ass den 20.12.1936 gebuer gin. Hien huet als Fondé de pouvoir vun 1964-96 bei der Esso évolueiert.

Hien war vun 82-2001 Buergemeeschter vu Bartreng an vun 90-2006 an der Chambre des Députés, wou hien och een vun den 3 Vize-Präsidenten war vun 99-2006. Hien huet och an dem Kontext Lëtzebuerger Delegatioun an der parlamentarescher Versammlung vun der NATO geleed.

Niewt sengem professionnellen a politeschen Engagement war den Niki e groussen Sportler, an huet als Spiller, Trainer, Präsident an Eierepräsident vun der Sparta grouss Mériten an war mat Härz a Séil fir sein Club do.

Hien war och Vizepräsident an der FLBB an déi lescht Joren hat hien fir der Association des Anciens du Basketball Luxembourgeois AABBL Präsidentschaft vum Comité d'organisation fir hiert 30jährech Bestehen ugeholl an mat sengem eenzechartechem Gescheck deen Anniversaire zu engem Succès gemach, ennert aanerem en neien Logo an eng Brochure mat enger séance académique wou mer haut nach gären drundenken.

Den Niki hannerléisst net nueren bei senger Famille, bei sengen Frënn souwéi an der Politik e groussen Vide, mee och an eiser grousser Basketsfamille. Vill vun eis wärten hien vermessen wann en ob Bartreng an d'Haal geet. Och bei den Events vun der AABBL wärte mir daks un hien zereckdenken.

 maatgedeelt vum Liliane Fisch, AABBL. 


Och d'DP trauert ëm den Niki Bettendorf

E jovialen, häerzlechen an dichtege Mënsch huet eis verlooss.

Am Alter vun 81 Joer ass den Niki Bettendorf gestuerwen. De laangjäregen Deputéierten an Éierebuergermeeschter vu Bartreng war 16 Joer laang an der Chamber (1990-2006) an 29 Joer laang un der Spëtzt vun der Gemeng Bartreng (1982, 1. Wiel als Proporzgemeng-2001).

Op nationalem Niveau huet den Niki Bettendorf sech zemol em d’Beräicher Gesondheet a Soziales bekëmmert, ë.a. als President vun der Santéskommissioun während der CSV-DP-Koalitioun vun 1999 bis 2004. Vun 1999 bis 2006 war hie Vizepresident vun der Chamber. Eng aner Missioun wor déi als President vun der Lëtzebuerger Delegatioun am NATO-Parlament.

Den Niki Bettendorf huet sech während senger politescher Carrière och vill ëm d’Uleies vun de Privatbeamte bekëmmert.

Bei de Chamberwahlen 1999 huet d’DP ënnert dem Zentrumspresident Niki Bettendorf eent vun hire beschte Wahlresultater an deem Bezierk realiséiert.

Als Bartrenger Buergermeeschter huet de gebiertege Bielesser Jong wéi keen zweeten d’Entwécklung vu Bartreng zu enger vun de modernsten an attraktiivsten Uertschaften am Zentrum vum Land marquéiert. Säin Numm steet z.B. fir de Bau vum „Centre Atert“ oder vun der Emgéiungsstrooss vu Bartreng. 

"Alles, wat mir haut zu Bartreng opweises hunn, fousst op der Aarbecht an der Initiativ vum Niki", ënnersträicht den aktuelle Buergermeeschter Frank Colabianchi. 

Dem Bettendorfs Niki säin Numm war och ganz enk mat der Bartrenger "Sparta" verknäppt, ëm déi hien sech als Spiller, Trainer an als President méi wéi verdéngt gemaach huet. De sportlechen Héichpunkt war sonner Zweiwel 1969, wéi den Niki „Back“-Spiller an der Championsequipe war. No senger politescher Carrière huet den Niki Bettendorf sech als Vizepresident vun der FLBB weider fir de Lëtzebuerger Basketball agesat.

Eis Presidentin Corinne Cahen erënnert sech un hir Gespréicher an der lescht mam Niki Bettendorf: „Äddi Niki. Ech si vill traureg. Du waars e Virbild. Ech si frou, dass mer di lescht Wochen nach iwwer villes zesumme konnte poteren. Deng Freed, wéi ech der gesot hunn, dass de Frank elo an d’Chamber kennt, wäert ech ni vergiessen. Dech, Niki, wäert ech ni vergiessen.“ 

Den Niki Bettendorf war e geruede Mënsch, fir deen e Wuert e Wuert war.

D’DP seet dem Verstuerwene senger Fra Henriette, senger Duechter Joëlle, senger ganzer Famill a senge sëlleche Frënn hiert häerzlechst Bäileed.

Är Condoleancen - Netikett


D'Commentairë gi gelueden, ee Moment w.e.g.!
Sollte se net geluede ginn, hutt der wahrscheinlech een AdBlocker lafen, dee se blockéiert. Dir misst en da sou astellen, dass en eisen Site net méi komplett blockéiert.