An der Déierepensioun "Lassie" zu Izeg këmmert sech d'Chantal Maquet zesumme mat hirer Ekipp ëm Hënn, Kazen, Päerd an nach eng ganz Partie aner Déieren. Mir hu si een Dag laang bei hirer Aarbecht begleet.
Fir d'Chantal Maquet ass d'Déierepensioun méi wéi just eng Aarbecht. Am Juli 2000 huet si "Lassie" gegrënnt. Aus dem Projet vun deemools ass mat de Joren eng grouss Déierepensioun ginn, an där eng ganz Ekipp dofir suergt, datt et den Déiere wärend der Absence vun hire Besëtzer un näischt feelt.
D'Pensioun läit zu Izeg, mat Wisen a Bëscher ronderëm – vill Plaz also virun allem fir déi Gäscht, déi op véier Patten ënnerwee sinn.
Wie mengt, an enger Déierepensioun géif et virun allem dorëms goen, e bësse mat Hënn a Kazen ze spillen, dee mierkt séier: Hannendru stécht vill méi Aarbecht.
D'Déiere musse gefiddert ginn, hir Plaze gebotzt an natierlech muss gekuckt ginn, ob et jidderengem gutt geet. Dobäi huet all Déier seng eege Gewunnechten a Besoinen. Deen ee brauch méi Beweegung, deen anere méi Rou – a munch Déier huet och säin eegent Fudder oder brauch eng speziell Betreiung.
Och wann ee bei enger Déierepensioun fir d'éischt un Hënn a Kazen denkt, ass d'Offer bei "Lassie" méi breet. Nieft Hënn a Kazen kënnen och Päerd, kleng Hausdéieren a Villercher hei betreit ginn. Dat bedeit fir d'Ekipp och, sech op ganz ënnerschiddlech Déieren anzestellen. E Päerd huet aner Besoine wéi eng Kaz an en Hond brauch nees eng aner Betreiung wéi e klengt Hausdéier.
Fir vill Besëtzer ass et net einfach, hiert Déier fir e puer Deeg oder souguer méi laang an aner Hänn ze ginn. Dowéinst setzt d'Déierepensioun op Transparenz. D'Besëtzer kënnen d'Installatioune kucken an hiert Déier selwer op seng Plaz begleeden. Esou gesi si, wou hiren Hond, hir Kaz oder en anert Déier déi nächst Deeg verbréngt.
Fir d'Chantal an hir Ekipp heescht dat awer och eng grouss Verantwortung. Déi ganz Zäit, wou d'Déier do ass, iwwerhuele si d'Roll vum Meeschter oder der Meeschtesch.
Botzen, fidderen, organiséieren an d'Déieren am A behalen: En Dag an enger Déierepensioun ass gutt gefëllt. Ma et gëtt natierlech och déi Momenter, fir déi een dëse Beruff mécht – wann en Hond sech iwwer säin Tour dobausse freet, eng Kaz sech kraule léisst oder e Stammclient scho bei der Arrivée genee weess, wou et higeet.
No méi wéi 25 Joer ass d'Déierepensioun "Lassie" fir d'Chantal Maquet dofir net einfach nëmmen hir Aarbechtsplaz. Déieren ze versuergen, ass hiren Alldag an eng Passioun, déi si all Dag op en Neits beschäftegt.
