D’Police hat wuel mat villem gerechent, wéi d’Alarmanlag vun der Webster Bank zu Ridge op Long Island lassgaangen ass. Net awer, datt hei e Réibock an d’Gebai agedronge war, den Alarm ausgeléist huet an du panesch probéiert huet, sech aus senger mësslecher Situatioun ze befreien.
En Iwwerfall war dëst op kee Fall an awer haten d’Poliziste vun der Suffolk County Police mam ongewollten Abriecher all Hänn voll ze dinn. Et huet e bësse gedauert, bis si d’Déier ze paken a berouegt kruten a mat Hëllef vun engem Seel a vill Manpower nees aus där Fënster erauskruten, duerch déi d’Réi agedronge war. Geklaut huet de Bock zwar näischt, dofir awer a senger Panik villes vum Inventaire vun der Bank beschiedegt, zerstéiert oder duercherneegehäit.
