Méi kleng wéi vill aner international Moud-Evenementer, bitt d’Luxembourg Fashion Week eppes, wat déi dacks net hunn: eng Plattform, op där kleng Designer hir Aarbecht weise kënnen.
D’Lëtzebuergerin Noémie Kugener huet hir Mark NOEMS zu Berlin gegrënnt. Déi jonk Designerin huet viru kuerzem e Stage bei der däitscher Mark Haderlump gemaach an huet am Kader vun der Fashion Week eng Serie vu Kleedungsstécker gewisen, déi hiert Kënnen an der Manipulatioun vum Stoff an de Vierdergrond gesat huet. Niewent präzis strukturéierte Jacketten an interessante Stoffkombinatiounen hunn d'Gäscht och dekonstruéiert gestréckte Stécker ze gesi kritt.
"Dat ass fir mech den éischte Schrëtt hei zu Lëtzebuerg", sot d’Kugener, déi bis elo just zu Berlin geschafft huet. Fir hatt ass Moud virun allem "Fräiheet".
Den Event zitt och Talenter vun iwwer eis Grenzen eraus un, bis wäit an d'Groussregioun. D'Minh Nguyen, déi tëscht Metz a Paräis lieft, huet hir Ofschlosskollektioun gewisen, déi fir d’éischt am Atelier Chardon Savard, enger Moudschoul zu Paräis, ze gesi war. D'Kollektioun ass inspiréiert vun hirer Kandheet, hirer Léift fir Manga, an der Geschicht vum Kostüm. Fir d’Nguyen ass d’Luxembourg Fashion Week net nëmmen eng Plaz, fir Kreatiounen ze weisen, mee och fir sech erëm mat anere vun der Branche ze verbannen.
Fir Newcomer kann sou e Catwalk vill bedeiten. "Fir mech ass dat wierklech eng grouss Geleeënheet", sot d’Kani Doumbouya, déi zu Léck baséiert ass an där hir Mark Manikani kloer geschniddene Looks mat minimalistesche Silhouettë gewisen huet, ergänzt duerch gestréckte Stécker. "Well ech eréischt zënter kuerzem Designerin sinn, ass et einfach fantastesch, hei ze sinn."
Mat der Editioun vun dësem Joer huet d’Luxembourg Fashion Week hire Potenzial gewisen an enger jonker an ambitiéiser neier Generatioun d’Bün ginn, niewent méi etabléiert Designer a Kreateuren.
