No enger Iwwerschwemmung am berüümte Grand Canyon am Weste vun den USA sinn eng 15 Mënschen nach ëmmer vermësst. Wéi den Nationalpark matgedeelt huet, ass et e Samschdeg zu der stënterlecher Iwwerschwemmung am Bright Angel Canyon komm, dat um Terrain vun der Phantom Ranch. Zesumme mat den Autoritéite vum US-Bundesstaat Arizona géif probéiert ginn, d'Mënschen a Sécherheet ze bréngen an all déi Betraffen ze erfaassen.
Den National Park Service (NPS) huet op senger Homepage ëm Informatiounen zu de 15 Leit gebieden, vun deenen et zanter der Iwwerschwemmung kee Liewenszeeche méi gouf. Zu der Iwwerschwemmung koum et e Samschdeg ëm 14:30 Auer Lokalzäit an dem Park, deen all Joers vun e puer Millioune Leit besicht gëtt. Bis e Sonndeg de Moie goufen deemno 62 Leit a Sécherheet bruecht. Meldungen iwwer Blesséierter oder Doudesaffer gouf et an engem éischten Ament net.
A Videoopname vu Wanderer ass ee Floss aus Bulli ze gesinn, deen un engem Wanderwee laanschtschéisst. Beem an aner Iwwerreschter sinn am Waasser ze gesinn.
D'Iwwerschwemmung hätt "schwéier Auswierkungen op d'Infrastruktur am ganze Bright Angel Canyon", huet den Nationalpark matgedeelt. Bal all Foussgängerbrécken iwwert de Bright Angel Creek wieren zerstéiert ginn, esou datt Wanderer net méi iwwert de Floss koumen.
D'Iwwerschwemmungen hätten och eng wichteg Waasserleitung beschiedegt, wat Probleemer mat der Waasserversuergung mat sech bruecht huet, huet de Park matgedeelt. Eng Rei Plazen, wou ee fir d'Nuecht ënnerkomme kann, goufen iwwerdeems zougemaach.
