Ee Pompjee gouf an der Nuecht op e Méindeg am Feier liicht blesséiert. D'Haiser ronderëm d'Hal hu missen evakuéiert ginn. De Pompjeesspriecher Pierre de Bouvier huet een traurege Fazit gezunn: "De Marché ass komplett zerstéiert, all Stänn sinn ofgebrannt an d'Metallstruktur ass an de Koup gefall."
Eng 150 Pompjeeë waren am Asaz. Well de "Marché des Enfants Rouges", deen 1615 gegrënnt gouf, matten tëscht Wunngebaier läit, konnten d'Pompjeeë just zu Fouss un d'Feier erukommen. D'Ursaach vum Feier ass nach net bekannt.
De "Marché des Enfants Rouges" ass deen eelsten iwwerdaachte Liewensmëttelmaart zu Paräis a steet zanter 1982 ënner Denkmalschutz. Den Numm kënnt vun de roude Kittelen, déi d'Kanner vun engem Weesenhaus an der Géigend ëmmer unhaten. D'Weesenhaus war vun der Marguerite de Navarre, der Schwëster vum Kinnek François I., am 16. Joerhonnert gegrënnt ginn.
An de leschte Joren hat sech de Marché ëmmer méi zu enger Touristendestinatioun entwéckelt. Hei gouf et Couscous, Austeren oder och nach Smoothies. Dem Magasinn "Food & Wine" no war de "Marché des Enfants Rouges" ee vun de beschte Streetfood-Marchéë weltwäit.
