Den 79 Joer ale fréiere Politiker wier bei enger geplangter Unhéierung en Dënschdeg net opgedaucht, sot de Virsëtzende vun der Opsiichtskommissioun am Representantenhaus, James Comer, zu Washington.
Och dem Clinton seng Fra, déi fréier Ausseministesch an Ex-Presidentschaftskandidatin Hillary Clinton, wëll net aussoen, wéi aus engem Bréif vun den Affekote vun der Koppel ervirgeet, dee vun der “New York Times” publizéiert gouf. D’Kommissioun, déi vu Republikaner dominéiert ass, hat d’Clintons fir en Dënschdeg an e Mëttwoch virgelueden. D’Affekote vun der Koppel argumentéieren, béid hätten d’Deputéiert scho “preventiv a fräiwëlleg” all Informatiounen zur Verfügung gestallt.
De Comer huet der Koppel wéinst hirem Net-Opdauche mat engem Verfaren wéinst der Mëssuechtung vum Kongress gedreet, dat d’nächst Woch an enger Ofstëmmung kéint an d’Weeër geleet ginn. Esou eng Prozedur kéint am schrooste Fall zu enger Geldstrof oder souguer enger Prisongsstrof féieren.
Den US-President Donald Trump huet dem Bill Clinton ënnerstallt, hien hätt däitlech méi mam Epstein ze di gehat, wéi hie selwer. Den Trump huet dowéinst Ermëttlungen géint de fréiere President a weider Demokraten an d’Weeër geleet. De Comer geheit dem Bill Clinton vir, 2002 an 2003 véiermol mam Epstein sengem private Fliger geflunn ze sinn an op d’mannst eng Kéier eng “Massage” vun engem Epstein-Affer krut ze hunn.
Dem Clinton säin Numm ass - wéi dee vum Trump a vun enge sëllegen anere Politiker a Prominenten - a bis ewell net publizéierten Akten zu der Epstein-Affär opgedaucht. Ee perséinlecht Feelverhale konnt awer weder dem Clinton nach dem Trump nogewise ginn.
De Fall Epstein belaascht den Trump zanter Méint. Dem Millionär a Finanzberoder Epstein, dee bis an déi héchste Kreesser vernetzt war, gouf virgeworf, an der Vergaangenheet iwwer Dausend Fraen a Meedercher mëssbraucht an deels u Prominenter weiderginn ze hunn.
Den Epstein, deen iwwer Joren eng Frëndschaft mam US-President Trump hat, war schonn 2008 verurteelt ginn, well hien d’Déngschter vu mannerjärege Prostituéierten an Usproch geholl hat. Wéinst engem ëmstriddenen Deal mam Parquet war d’Strof deemools allerdéngs just 18 Méint Prisong.
2019 gouf den Epstein ënnert anerem wéinst dem sexuelle Mëssbrauch vu Mannerjäregen op en Neits festgeholl. Ronn ee Mount no senger Festnam gouf hien dout a senger Zell an engem New Yorker Prisong fonnt. Den Autoritéiten no hätt hie sech d’Liewe geholl.
