Fir seng Leeschtungen am Technologie-Beräich huet den US-President Trump de Geschäftsmann Elon Musk mam héchste Wësseschaftspräis vum Land ausgezeechent. Bei enger Zeremonie am Friddensinstitut zu Washington huet den Trump dem Tech-Milliardär en Donneschdeg déi renomméiert National Medal of Science iwwerreecht. Den Trump huet de Musk bei der Präisiwwerreechung "nationale Schatz" genannt an hie mam Erfinder vun der Bier, dem Thomas Edison, verglach.
D'Auszeechnung gouf am Kader vum Technologie-Sommet "Wëssenschaft: En neie gëllenen Zäitalter" iwwerreecht. Ausser dem Musk kruten och de Google-Matgrënner Sergey Brin, den Nvidia-Ceo Jensen Huang an d'Cheffin vum Chipproduzent AMD Lisa Su déi selwecht Medail. Och den Tech-Investisseur Michael Dell an de Microsoft-Ceo Satya Nadella krute mat der National Medal of Technology and Innovation déi héchst US-Auszeechnung an deem Beräich.
D'Iwwerreechung vun der Medail un de Musk huet frëndlech gewierkt, awer e bëssen onbehollef. De President huet dem Tech-Milliardär op de Réck geklappt, wärend hien him d'Këscht mat der Medail iwwerreecht huet. Déi zwee schéngen Bléckkontakt z'evitéieren. Wärend hien dem Musk d'Medail ginn huet, sot den Trump: "Elon, ech wëll dir gratuléieren. Du bass mäi Kolleeg an all dat, mä du bass ee ganz, ganz besonnesche Mënsch."
De Musk hat dem Trump um Ufank vu senger zweeter Amtszäit als Beroder zur Säit gestanen an am Optrag vum President Dausenden Aarbechtsplaze beim Staat a Ministèrë gestrach. Am Mee 2025 huet de Musk beim Regierungsdepartement fir staatlech Effizienz (Doge) awer wéinst engem Sträit mam Trump iwwer d'Staatsscholden, déi massiv klammen, gekënnegt.
Antëscht wieren déi Zwee awer nees gutt mateneen. Dem Multimiliardär Musk, Grënner vun der KI-Entreprise xAI an der Rakéitenentreprise SpaceX, gi vu Kritiker ëmmer nees rietsgeriicht, demokratiefeindlech a rassistesch Tendenze virgeworf.
Och un den Trump selwer gouf beim Evenement geduecht: Den US-President krut eng Billerrumm, an där d'National Medal of Science dra war, déi säi gestuerwene Monni John Trump posthum kritt huet. Säi Monni war Proff op der renomméierter Uni Massachusetts Institute of Technology (MIT).
Den Trump huet a senge Rieden ëmmer nees op säi Monni verwisen - meeschtens am Kontext mat senger eegener Intelligenz. Hien hätt vu sengem Monni den "héchsten IQ" geierft, sot hien ëmmer nees. Hie féiert dat op "gutt Geenen" zréck.
