D'USA hunn e Mëttwoch matgedeelt, datt si hir Missioun géint Dschihadisten am Irak "offiziell ofgeschloss" hunn, nodeems d'Truppe vun der Air Base zu Erbil an der Kurdescher Regioun zeréckgezu goufen.
No méi wéi engem Joerzéngt huet déi vun den USA geleet Koalitioun annoncéiert, datt si hir Operatioun géint den IS am Irak an a Syrien ofschléisst.
Déi islamistesch Grupp, déi grouss Deeler vun deenen zwee Länner ënnert hir Kontroll bruecht a brutal Iwwergrëff verübt hat, huet 2017 am Irak an 2019 a Syrien verluer. D'Koalitiounstruppe sinn awer am Land bliwwen, fir weider géint déi verbleiwend Kämpfer vun der Grupp virzegoen.
"Haut hunn déi Vereenegt Staaten an eis Koalitiounspartner d'Operatioun 'Inherent Resolve' am Irak, konform mat der gemeinsamer Erklärung vun der US an dem Irak vu September 2024 an den nationalen Interessen, offiziell ofgeschloss", esou de Pentagon-Spriecher Sean Parnell. "De geuerdente Réckzuch vun de Koalitiounstruppen a Rüstunge vun der Erbil Air Base markéiert den erfollegräiche Schluss vun der militärescher Missioun, déi géint den Islamesche Staat am Irak gewonnen huet."
Bagdad a Washington haten 2024 decidéiert, d'Missioun vun der Koalitioun ofzebauen. D'Truppe goufen no an no aus de Basen am ganze Land ofgezunn an hir Präsenz op déi autonom kurdesch Regioun am Norde limitéiert.
Déi irakesch Regierung ass der Meenung, datt de Réckzuch vun der Koalitioun de Virwand ewechhëlt, op deen déi vum Iran gestëtzte Milizgruppe sech bis elo beruff hunn, fir hir Waffen ze halen.
