Op Demande vum Grupp waren all weiblech Mataarbechterinnen temporär ofgezu ginn. Doropshin huet d'Personal aus Protest e Méindeg d'Aarbecht néiergeluecht. En Dënschdeg soll den Eiffeltuerm awer nees wéi gewinnt op sinn.
D'Mataarbechter vum Eiffeltuerm hunn déi "déngschtlech Uweisunge" verurteelt, déi dozou gefouert haten, datt weiblech Mataarbechterinne wärend der Visitt vum hinduistesche Grupp Bochasanwasi Akshar Swaminarayan Sanstha (BAPS) e Samschdeg "wéinst hirem Geschlecht ausgegrenzt, ersat an onsiichtbar gemaach goufen".
De Bedreiwer vum Eiffeltuerm Sete huet erkläert, datt déi hinduistesch Delegatioun ugefrot hat, d'Visitt esou z'organiséieren, datt "Interaktioune mat Frae" limitéiert géinge ginn. "Dës Konditioun" hätt "net akzeptéiert dierfte ginn". "Mir wäerten opklären, wat geschitt ass, an déi néideg Konsequenzen zéien", esou de Sete-President Ariel Weil géigeniwwer der Noriichtenagence AFP.
Och de Buergermeeschter vu Paräis, den Emmanuel Grégoire, huet op X erkläert, datt et "inakzeptabel" wier, datt de Bedreiwer vum Eiffeltuerm deene Bedéngungen zougestëmmt hätt.
Baps steet der konservativer, hindu-nationalistescher Partei vum indesche Premier Narendra Modi no. De Grupp hat e Sonndeg an der Géigend vu Paräis hiren éischte groussen Tempel a Frankräich ageweit.
