Eelef Leit wieren iwwerdeems blesséiert ginn, huet déi saudi-arabesch Loftfaartagence op X matgedeelt. D'Doudesaffer wier ee Pakistaner. D'Ausmooss vun de materielle Schied misst nach ënnersicht ginn.
D'Militärkoalitioun géint déi jemenittesch Huthi-Miliz, déi vu Saudi-Arabien ugefouert gëtt, hat virdru matgedeelt, ee Geschoss wier am Terminal 4 vum Fluchhafen ageschloen an hätt ee Feier ausgeléist. D'Loftofwier hätt iwwerdeems eng Rakéit an der Géigend vum Fluchhafen ofgefaangen an zerstéiert, esou de Koalitiounsspriecher Turki al-Maliki.
D'Huthi-Miliz huet matgedeelt, eng Rei Ziler an d'Viséier geholl gehat ze hunn, dorënner de Fluchhafe vu Riad, de Fluchhafe vun Dammam am Oste vu Saudi-Arabien, an zwou Anlage vum staatleche Pëtrolskonzern Aramco.
E Samschdeg scho ware bei engem Ugrëff op de Fluchhafe vu Riad 12 Mënschen ëm d'Liewe komm an 309 weiderer goufe blesséiert. Déi indesch Ambassade hat e Sonndeg iwwerdeems och nach den Doud vun engem Inder bekannt ginn, woumat d'Zuel vun den Doudesaffer op 13 geklommen ass.
De Fluchhafen ass zanter e Samschdeg zou. Dat soll nach bis Méindeg 23 Auer eiser Zäit esou bleiwen, wéi et op der Websäit Flightradar24 geheescht huet. D'Militärkoalitioun mat Saudi-Arabien un der Spëtzt huet d'Huthi-Miliz fir d'Attacke verantwortlech gemaach an huet eng "decidéiert" Reaktioun annoncéiert.
