An der Stad Thusis ass an der Nuecht op e Freideg en Haus mat Wunnengen an engem Restaurant dran ausgebrannt. Aacht Leit goufe beim Brand blesséiert, fënnef Leit ginn der Police no nach vermësst. Zu Schaffhausen un der Grenz mat Däitschland goufe bei engem weidere Wunnengsbrand eelef Leit verwonnt.
Wéi et vun der Police vum Kanton Graubünden heescht, hätten zu Thusis 14 Leit d'Gebai kënne verloossen. Ënner hinne sinn aacht Blesséierter, dorënner zwee schwéier.
Éischten Erkenntnisser no war d'Feier op der zweeter Etage vum Gebai ausgebrach, d'Pompjeeë goufe kuerz no Mëtternuecht alarméiert. Well d'Trapenhaus an de Koup gefall war, huet den Daach misse mat engem Kran opgemaach ginn. D'Läschaarbechte waren och e Freideg de Moien nach amgaangen, bal 100 Pompjeeë waren am Asaz.
Déi Blesséiert goufen der Police no nach op der Plaz behandelt, éier si a Spideeler zu Chur, Thusis, Ilanz an Zürech bruecht goufen. Fënnef Leit ginn awer nach vermësst, wéi d'Police erkläert. Op enger Foto vun der Police ass ze gesinn, wéi aus dem zweete Stack grouss Flamen erauskommen an eng Dampwollek iwwer dem Gebai ass.
Zu Schaffhausen un der däitscher Grenz war en Donneschdeg den Owend géint 22:30 Auer e Brand an enger Wunneng ausgebrach. Wéi d'Police matgedeelt huet, stoung d'Wunneng komplett a Brand, wéi d'Secouristen op der Plaz ukoumen. D'Pompjeeë konnte verhënneren, datt d'Feier op weider Appartementer iwwergräift.
Eelef Mënsche goufen zu Schaffhausen beim Brand blesséiert, néng vun hinnen hu missen an d'Spidol. Ënnert de Blesséierten ass och eng Polizistin. Éischten Erkenntnisser no war de Brand an der Kiche vun der betraffener Wunneng ausgebrach. "Déi genee Brandursaach gëtt ermëttelt", esou d'Police nach.
