En indesche Mann steet zanter e Méindeg zu Paräis viru Geriicht. Hie soll e Mëssbrauch-Netzwierk mat neonazistescher Ideologie geleet hunn, bei deem mannerjäreg Meedercher zu sexuellen Handlunge gezwonge goufen, an dozou sech selwer ze verletzen.
De Grupp soll virun allem jonk Meedercher aus den USA, Holland, Groussbritannien an Estland mëssbraucht hunn.
Ermëttler soen, d'Täter wiere Männer aus Däitschland, Neiséiland an den USA gewiescht, déi iwwer d'Plattform Discord kommunizéiert hunn. Si hätte rassistesch an antisemittesch Iddie vertrueden an eng staark Feindlechkeet géint Feministinnen an der LGBTQ-Communautéit ausgedréckt.
De Rohan Rane, 29 Joer al an indesche Staatsbierger, gëtt vun den Ermëttler als Kapp vum Grupp beschriwwen. Hien huet a Frankräich op enger Business-Schoul zu Antibes studéiert an ass duerno Fitnesscoach ginn. 2021 gouf hie festgeholl.
Hie gëtt ënner anerem wéinst Folter, organiséierter Erpressung a Verbreedung vu Material vu sexuellem Mëssbrauch vu Kanner ugeklot.
Bei enger Verurteelung kéint hie liewenslaang Prisong kréien.
De Fall gouf am November 2020 duerch eng Meldung vum US National Center for Missing and Exploited Children ausgeléist.
D'Organisatioun hat online Biller vun engem 12 Joer ale Meedche fonnt, dat mat plakeger Broscht ze gesi war, wärend en anere Benotzer hatt encouragéiert huet, den Numm "Rohan" a seng Haut ze rëtzen.
Fënnef amerikanesch Fraen, haut tëscht 18 an 21 Joer al, hu sech dem Prozess ugeschloss a sollen dës Woch per Video aussoen.
Engem Dokument vum US Department of Justice no hätt de Grupp mam Numm CVLT "Neo-Nazismus, Nihilismus a Pedophilie" als Kär-Prinzippie vertrueden.
D'Ermëttlung huet gewisen, datt d'Membere vulnerabel Meedercher op Instagram an anere Plattformen ugezunn hunn.
Si hunn d'Meedercher dozou bruecht, hinne Biller ze schécken, op deene si plakeg sinn. Duerno hu si domadder gedreet, d'Biller ze verëffentlechen oder den Noutruff ze wielen, fir datt d'Sécherheetsautoritéite virun hir Dier kommen.
D'Täter, déi sech "Warlords" genannt hunn, hunn hir Affer, dacks jiddesch oder schwaarz, als "Sklavinne" bezeechent, si zu sexuellen Akte mat Messere genéidegt an och dozou, sech d'Nimm vun de Männer oder Hakekräizer an hir Haut ze rëtzen.
Si hunn d'Meedercher, déi si och "Housewives" genannt hunn, zu Suicide ugestachelt. Si hu missen zum Beispill Bleechmëttel drénken oder sech mat engem Rimm oder enger Léngt erwiergen.
Ee vun dëse "Warlords", e 26 Joer alen US-Bierger, ass an den USA scho verurteelt ginn, well hien 2021 en 12 Joer alt Meedchen entféiert a vergewaltegt huet.
De Parquet zu Paräis huet de Prozess hanner zouenen Dieren ugeluecht, op Ufro vun den US-Autoritéiten.
De Parquet huet dat domat begrënnt, datt de Grupp ronderëm de Rane, déi besonnesch an den USA aktiv war, versicht huet, d'Affer an d'Zeien ze intimidéieren an d'US-Procureuren ze menacéieren. Ausserdeem géifen am Prozess Videoe mat Folter an Erniddregung vu Meedercher ënner 15 Joer gewise ginn.
Den Affekot Hippolyte Marquetty, deen déi fënnef US-Affer vertrëtt, hat sech géint d'Zoumaache vum Prozess ausgeschwat, mee ouni Erfolleg.
Seng Clienten hätten et wichteg fonnt, op d'Geforen opmierksam ze maachen, mat deene jonk Meedercher op sozialen Netzwierker konfrontéiert sinn.
