No Menacë vu militäreschen Asätz vum US-President huet den iranesche Parlamentspresident den USA mat Revanche gedreet. “Am Fall vun enger militärescher Attack duerch d’USA wäerte souwuel dat besat Gebitt wéi och d’Zentere vum US-Militär an d’Schëfffaart eis legitim Ziler sinn”, sot de Mohammes Bagher Ghalibaf e Sonndeg an enger Ried, déi op der Staatstëlee iwwerdroe gouf. Mat “besatem Gebitt” huet de Ghalibaf sech wuel op Israel bezunn, deem säin Existenzrecht vun Teheran net unerkannt gëtt.
Den Donald Trump hat an de leschten Deeg e puer Mol mat engem militäreschen Agräife vun den USA am Iran gedreet, falls déi iranesch Sécherheetsbeamte mat Gewalt géint Demonstrante géinge virgoen. Mënscherechtsorganisatiounen no goufen zanter dem Ufank vun de Maniffen Enn Dezember schonn Dosende Leit ëmbruecht, d’Regierung vun der islamescher Republik huet e Freideg landeswäit den Internet gespaart.
Engem Artikel vun der “New York Times” no gouf den US-President schonn iwwer Optioune fir méiglech militäresch Attacken op den Iran informéiert. Deemno huet den Trump nach net definitiv iwwer eng Attack decidéiert. De leschte Juni haten d’Vereenegt Natioune schonn Atomanlagen am Iran bombardéiert.
