Op engem Volleksfest a Rheinland-Pfalz ass e Freideg am Nomëtteg wéinst dem uerge Stuerm eng Traverse aus Metall erofgefall. Dobäi ass e Mann liewesgeféierlech blesséiert ginn, en anere schwéier. Un der Konstruktioun wier e Reklammeplakat festgemaach gewiescht.
De Virfall ass an der Stad Nastätten geschitt, tëscht Koblenz a Frankfurt, wou de Moment Oktobermarkt ass. Nom Accident war d'Kiermes zougemaach ginn, soll awer iwwert de Weekend weidergoen. D'Police ermëttelt a sicht no Spueren an Zeien. Fir eventuell traumatiséiert Leit soll psychologesch Hëllef ugebuede ginn.
Wandspëtzte vu 60 bis 75 Kilometer an der Stonn sinn e Freideg a Rheinland-Pfalz gemooss ginn. Nastätten läit am Taunus, no der Grenz zu Hessen.
