Déi däitsch Fluchgesellschaft Lufthansa huet sech duerchgesat an däerf bal d'Hallschent vun der portugisescher Fluchgesellschaft TAP Air Portugal iwwerhuelen. Dat huet de portugisesche Premierminister Luís Montenegro e Mëttwoch matgedeelt. Lufthansa huet 1,025 Milliarden Euro fir 44,9 Prozent vun TAP ugebueden a konnt sech domat géint Air France-KLM duerchsetzen.
Déi portugisesch Regierung behält 50,1 Prozent vun den Aktie vun TAP, wärend d'Mataarbechter virleefeg 5 Prozent halen.
Portugal wëllt sécherstellen, datt Lissabon e wichtegen Hub fir Flich op Brasilien an Afrika bleift an datt de Sëtz vun der Gesellschaft a Portugal bleift.
TAP war 2020 wärend der Corona-Kris nees verstaatlecht ginn. D'EU hat 2021 eng Staatshëllef vun 3,2 Milliarden Euro guttgeheescht.
Am zweete Véierel 2026 huet TAP e Verloscht vun 59,3 Milliounen Euro gemaach, nodeems si am selwechte Véierel vum Joer virdrun nach 38,3 Milliounen Euro Gewënn hat.
TAP hat am Summerquartal nawell e Rekord vun 8,2 Millioune Passagéier erreecht.
D'Fluchgesellschaft bedéngt d'Linn tëscht Lëtzebuerg a Lissabon mat ronn 8 direkte Flich pro Woch no aktuelle Pläng.
Wéi an ob d'Stréck dovunner betraff ass, léisst sech nach net soen. Portugal betount awer, datt Lissabon e strategeschen Hub soll bleiwen. Dat kéint souguer positiv fir d'Verbindungen a Richtung Portugal sinn.
