Et géif sech ëm eng Registréierung vun der Mark handelen, déi keng Absichtserklärung wär, d’Geschäfter a Russland nees opzehuelen, hu Fachleit erkläert. Och d’Entreprise selwer huet entspriechend Pläng fir e Retour bestridden.
De Stuttgarter Autohiersteller Mercedes-Benz huet nom russeschen Ugrëff op d’Ukrain de 24. Februar 2022 seng Exporter a Russland agestallt an d’Produktioun am Land gestoppt. Mee d’prorussesch Bloggerin Alina Lipp huet zum Beispill an engem X-Post vum 12. Januar 2026, dee méi wéi 44.000 Mol gekuckt gouf, spekuléiert: “Kënnt Mercedes zeréck a Russland?” Hir Begrënnung: “Mercedes-Benz, dat Russland 2022 verlooss huet, huet op en Neits seng Mark am Land registréiert.” Als Beleeg huet si en Dokument mat engem russeschen Text gedeelt. Dora sinn en Datum, d’russescht Wope souwéi den Numm vum Autohiersteller a laténgescher Schrëft ze gesinn. “Dat war et mat der Solidaritéit fir d’Ukrain”, heescht et an der Lipp hirem Bäitrag um Enn. D’AFP huet schonn eng Rëtsch Behaaptunge richteggestallt, déi si gedeelt huet.
D’Behaaptung gouf och an enger Abberzuel Telegram-Kaneel , op Facebook an a Sprooche wéi Englesch, Franséisch, Polnesch a Rumänesch verbreet. Och d’däitschsproocheg Websäit vum “Pravda"-Netzwierk, dat Russland fir d’Verbreedung vu Falschinformatiounen notzt, huet d’Behaaptung gedeelt.
D’Bäiträg mat der aus dem Kontext gerappter Behaaptung änele vun der Sprooch hier enger Meldung vun der staatlecher russescher Noriichtenagence “Ria Novosti” vum 12. Januar 2026, déi a munche Bäiträg och als Quell genannt gouf.
Mee dat gedeelt Dokument ass kee Beleeg dofir, dass Mercedes-Benz wirtschaftlech Aktivitéiten op dem russesche Maart ophëlt oder plangt.
Dat gedeelt Dokument ass an änlecher Form an der Datebank vum russesche Patentamt Rospatent ze fannen. D’AFP huet et fir d’lescht den 20. Januar 2026 opgeruff. Dobäi handelt et sech tatsächlech ëm d’Registréierung vun enger Mark vu Mercedes-Benz.
Informatiounen am Dokument no handelt et sech beim Proprietär vun der Mark ëm den Autohiersteller mat Sëtz zu Stuttgart. D’Mark gouf deemno de 5. Januar 2026 registréiert. De Schutz leeft am September 2035 of, also zéng Joer no der Demande am Hierscht 2025. An der online gedeelter Versioun sinn Informatioune wéi d’Registréierungs- oder d’Umellungsnummer net ze gesinn.
Eng Rei däitsch Konzerner hu sech am Joer 2022 vum russesche Maart zeréckgezunn, dorënner Mercedes-Benz. D’Entreprise hat Medieberichter no am Mäerz 2022 matgedeelt, Exporter a Russland an d’Produktioun sur place ze stoppen. Och Konkurrente wéi BMW an de VW-Konzern haten hir geschäftlech Aktivitéiten am Land agefruer. Vun Audi huet d’AFP beispillsweis och entspriechend Berichter fonnt. Wéinst dem Réckzuch wierkt eng Registréierung vun der Mark Mercedes-Benz op den éischte Bléck widderspréchlech. Mee Expertinnen an Experten, déi vun der AFP kontaktéiert goufen, hunn erkläert, dass dës Moossnam sënnvoll wär - a virun allem net zwangsleefeg bedeite géif, dass Entreprisë plange géifen, am Land ze produzéieren oder dohin ze exportéieren.
Eng reegelméisseg Registréierung vun enger Mark a Russland géif der Rechtsofsécherung déngen, huet d’Marisa Michels, Affekotin fir industriell Proprietéit, de 16. Januar 2026 op AFP-Ufro erkläert. Esou eng Registréierung eleng wär “kee Bekenntnis fir Produktiounspläng”. Villméi géife “vill international Entreprisen” hir Marken a Russland oprechterhalen, “fir Mëssbrauch duerch Drëtter ze verhënneren”.
D’Umelldung géif preventiv “fir eng méiglech zukünfteg Notzung nom Enn vun de Sanktioune” geschéien. Opgrond vum russeschen Ugrëffskrich hat d’EU an enger Rei vu Schrëtt Finanz- a Wirtschaftssanktioune géint Russland decidéiert. Gläichzäiteg huet d’Registréierung bei Rospatent “keng Verflichtung (an och kee Recht), am Land ze produzéieren oder ze verkafen”, huet d’Michels geschriwwen.
Änlech huet den Thomas Brand, Affekot an enger däitsch-russescher Etude zu Moskau, d’Rechtssituatioun duergeluecht, wéi et op der Internetsäit vun der Etude heescht. Gefrot, ob Entreprise sech mat der Registréierung vun enger Mark automatesch zu enger Produktioun oder dem Export bekennen, huet de Brand dat de 15. Januar 2026 géintiwwer der AFP mat Nee kommentéiert. “Et geet just ëm de rechtleche Schutz vun der Mark.” Dat géif bedeiten, dass eng Entreprise aneren ënnersoe kéint, ënner hirer Mark zum Beispill Autoen ze verkafen.
“Dem russesche Recht no kann de Markeschutz annuléiert ginn, wann eng Mark fir dräi Joer oder méi a Russland net méi genotzt gëtt”, huet de Brand erkläert. Grondsätzlech géif dëse fir zéng Joer gëllen a kéint verlängert ginn. Zwar sinn däitsch Autoen a Russland trotz Sanktiounen duerch Drëtter verfügbar, wéi vill Medie gemellt hunn. Hiersteller kéinten dat dem Affekot Brand no kaum verhënneren. Mee well si den Export a Russland opgrond vun EU-Sanktiounen am Moment net selwer duerchféiere kënnen, wär d’Oprechterhale vum Markeschutz net garantéiert. Ëmmerhi géif Rospatent déi aktuell Netnotzung net suivéieren, Konkurrenten oder iergendwellech Drëtter kéinten awer eng Demande stellen, dass d’Registréierung geläscht gëtt. Entspriechend Kloe wären “am Moment zimmlech verbreet”.
De Brand huet ugemierkt, dass d’Markeregistréierung “net déi scho geschützt Mark betreffe” kéint. Dat bedeit, dass eng Mark net duebel ugemellt ka ginn. Dohier géifen Entreprisë versichen, “änlech Marke fir aner Produkter oder Servicer ze registréieren, fir wéinstens e gewësse Schutz opzebauen”, huet den Affekot op Nofro geschriwwen. Dat geléngt zum Beispill duerch d’Ergänzung vun enger Mark ëm Bildelementer oder d’Aktualiséierung vum Markebild souwéi vum Wuereverzeechnes, wéi a Medieberichter ugeféiert gëtt. Trotz engem verännerte Schutzëmfang kéinte Marken duerch geschéckt Ëmsetzung geschützt ginn.
“Dës Strategie kann hëllefen, d’Mark fir e méigleche spéidere Retour op de Maart virzebereeden - och wann eng aktiv Notzung aktuell net ausgeschloss ass”, hat och d’Michels an enger Emissioun am August 2025 gesot.
Eng Stéchwierdersich ergouf keng däitschsproocheg Meldungen iwwer en Neesophuele vun de Russland-Geschäfter vu Mercedes-Benz. Déi staatseege russesch Noriichtenagence Tass hat den 12. September 2025 iwwer d’Demande vun der Entreprise fir eng Registréierung vun der Mark bericht. An där Meldung heescht et ënner anerem, dass den Autoshiersteller seng Exporter a Russland an d’Produktioun sur place am Mäerz 2022 op en Enn bruecht hat. Ernimmt gëtt och, dass d’russesch Entreprise Avtodom déi fréier Produktiounsanlagen an der Géigend vu Moskau iwwerholl huet. “Dës Moossnam sollt net als Schrëtt a Richtung vun engem Retour a Russland ugesi ginn”, gëtt e Spriecher vun Avtodom zitéiert. Des Weidere sot hien dem Bericht no: “D’Registréierung vun enger Mark ass just eng Schutzmoossnam, fir sécherzestellen, dass de Copyright net vun anere genotzt gëtt a keng Schied ausléise kënnen.” Aner Marken aus der Automobilindustrie hätten “dat selwecht gemaach”.
Den däitsche Konzern huet sech awer de Berichter no eng Réckkafoptioun geséchert. Falls d’Sanktioune géint Russland also nees opgehuewe géifen, ka Mercedes-Benz seng Undeeler un der Entreprise nees zeréckkafen.
E Spriecher vu Mercedes-Benz huet de 15. Januar 2026 der AFP geschriwwen: “Mir erhalen eis jeeweileg Marken am Konzern oprecht, fir dass keen Drëtte sech dëse Markerechter bemächtege kann.” Hien huet dat och mam russesche Markerecht begrënnt. “Dat ass keen Hiweis op eng Virbereedung fir e Retour op de russesche Maart, mee déngt dem Erhale vun der Proprietéit.”
Dës Markenumellunge wären ausserdeem net vun de Sanktioune betraff, sot de Spriecher a goung domat op d’Spekulatiounen, déi am Internet verbreet goufen, an, dass den däitsche Konzern “d’Solidariséierung mat der Ukrain” vun der EU mëssuechte géif. Dass d’Umeldung vun der Mark net ënner d’Sanktioune fält, hunn och d’Affekote Michels a Brand der AFP confirméiert.
Berichter, déi e “Retour vu westlechen Entreprisë” suggeréieren, sinn a russesche Medie wäit verbreet, Eng Sich am Internet no de Stéchwierder “Mark” a “registréiert” op Russesch hat eng Rëtsch Treffer als Resultat. Russesch Medien hunn am Januar 2026 dacks iwwer Markeregistréierunge vun internationalen Entreprisë bericht.
D’AFP huet weider Faktenchecken iwwer den Ukrain-Krich verëffentlecht.
Fazit: En am Internet gedeelt Dokument soll beleeën, dass Mercedes-Benz seng wirtschaftlech Aktivitéiten a Russland nees ophuele wéilt. Mee dobäi handelt et sech ëm eng Registréierung vun der Mark beim russesche Patentamt. Wéi Fachleit confirméiert hunn, beleet dat net d’Absicht vun engem Retour op de russesche Maart. D’Entreprise selwer huet entspriechend Pläng bestridden.
Dëse Faktencheck gouf vun RTL op Lëtzebuergesch iwwersat.
