Dausende Militärleit sti prett, fir bei eventuelle Rettungsaktiounen ze hëllefen. Gläichzäiteg probéieren d'Autoritéiten, d'Stroumversuergung fir Dausende Stéit nees hierzestellen. Besonnesch betraff sinn d'Küsteregiounen.
An Taiwan sinn e Freideg wéinst dem Taifun "Champi" déi meescht Geschäfter a Schoulen zou bliwwen. Méi wéi 2.600 Mënschen hu missen hir Haiser verloossen, fir sech virum Stuerm a Sécherheet ze bréngen.
De Champi soll nordëstlech un Taiwan laanscht an duerno a Richtung China a Japan weiderzéien. Wéinst dem Taifun goufen an der Regioun schonn honnerte Flich annuléiert.
Et ass bis ewell op d'mannst eng Persoun ëm d'Liewe komm, nodeems si vu staarke Wellen an d'Mier gerappt gouf. Méi wéi 160 weider Persoune goufe blesséiert.
Den Taifun ass ee vu ville staarken tropesche Stierm, déi dës Saison am Pazifik opgetruede sinn. D'Wiederphenomeen El Niño, dat fir aussergewéinlech héich Waassertemperaturen am equatoriale Pazifik suergt, huet dës Entwécklung nach weider verstäerkt.
Tëschenzäitlech hat de Champi d'Stäerkt vun engem Supertaifun erreecht, mat Wandvitessë vu bal 300 Kilometer an der Stonn. Duerno huet de Stuerm u Kraaft verluer, ier en e Freideg de Mëtteg nees méi staark ginn ass.
