Et hätt keng "Paus" beim Weidergi vun Informatioune ginn, esou de Rubio e Méindeg virun der Press am Kader vun enger Visitt am Usbekistan. Gläichzäiteg huet en den ukrainesche President Selenskyj opgefuerdert, sech op en Enn vum Krich mat Russland ze konzentréieren.
"Wourop hie sech konzentréiere sollt a wourop mir eis konzentréiere wëllen, ass, dëse Krich op en Enn ze bréngen", esou de Rubio. De Selenskyj hat e Sonndeg erkläert, datt d'USA no enger Ënnerbriechung vun e puer Deeg nees Geheimdéngschtinformatiounen u Kiew liwweren. "Et war blockéiert fir eng Zäit. An du gouf et nees vun US-Säit deblockéiert", esou den ukrainesche President an engem Interview mam Sender NBC. Déi ukrainesch Arméi hätt "dräi Deeg laang" wärend russeschen Ugrëff mat ballistesche Rakéite keen Zougrëff op US-Geheimdéngschtinfoe gehat, wat säi Land geschwächt hätt. "Elo funktionéiert et nees", sou de Selenskyj.
D'Äusserunge falen an enger Phas vu wuessenden Tensiounen tëscht Washington a Kiew. Den US-President Trump hat e Freideg schonn decidéiert Sanktioune géint Russland nees ausgesat, kuerz ier dës hätte solle Kraaft trieden. E Sonndeg huet den US-President seng Decisioun zum Deel och géint Kritik aus den eegene republikanesche Reie verdeedegt. Hie wéilt "näischt maachen, wat Russland vum Verhandlungsdësch ewechbrénge kéint".
