D'Vereenegt Staaten hunn e Sonndeg confirméiert, datt all B-1 Bombere vun der RAF-Airbase Fairford zeréckgezu goufen. D'Police war de 27. September alarméiert ginn, nodeems e Bauer aus der Géigend e Grupp Männer a verschiddene Camionnettë gemellt hat, déi sech "verdächteg" beholl haten. D'Situatioun hat dozou gefouert, datt 85 Haiser an der Noperschaft evakuéiert goufen.
D'Basis war an de leschte Méint vun den USA benotzt ginn, fir Ugrëff op den Iran ze lancéieren. Am Mäerz hat Groussbritannien den USA offiziell autoriséiert, Fairford fir "spezifesch defensiv Operatiounen am Iran" ze benotzen. Ermëttler hunn an de Gefierer kee Sprengstoff, mee "eng Quantitéit u Bensinn" fonnt, esou d'Anti-Terror-Police.
E Spriecher vum Pentagon sot e Sonndeg: "Mir kënnen elo confirméieren, datt all US-Bomberen, déi zu Fairford stationéiert waren, op hir Basen an den USA zeréckbruecht goufen." Aus "operativer Sécherheet" hätt een dës Beweegungen net a Realzäit kënne matdeelen.
D'Spekulatioune ronderëm de Virfall reeche vun engem méiglechen Terrorhannergrond bis hin zu Bensinnsklau, well d'Energiepräisser am Vereenegte Kinnekräich op Rekordhéicht geklomme sinn. Sechs Männer vu London, dorënner eng Persoun mat brittesch‑iranescher Duebelnationalitéit, all Mëtt zwanzeg, goufen no hirer Festnam op Kautioun fräigelooss, wat zu Kritik vu Washington gefouert hat.
"Ech hätt dat net gemaach", sot den US-President Donald Trump. Säin Ausseminister Marco Rubio huet vun engem "auslänneschen Acteur" geschwat. De brittesche Premier Andy Burnham huet gesot, et géif "staark Indizien" ginn, datt den Iran involvéiert gewiescht kéint sinn. D'iranesch Ambassade zu London huet all Virworf géint Teheran "kategoresch dementéiert a schaarf verurteelt".
