Zwee Modeller vun FFP2-Masken hu sech nodréiglech als net konform erausgestallt. Nieft den Zänndoktere krut och de Prisong esou Maske geliwwert.

D'Pandemie wier gutt geréiert ginn, et hätt bis haut kee Fall vu Covid-19 bannent dem Prisong ginn, verséchert de Serge Legil, Direkter vun der Prisongsverwaltung. Och duerch déi net konform FFP2-Maske wier keng Gefor entstanen.

FFP2-Masken am Prisong/Reportage Monica Camposeo

"Bei der Liwwerung vun engem chinesesche Fournisseur, wou mir gesot kruten, dass d'Masken den Ufuerderungen net entspriechen an ënner 94% filtréieren, do hu mir nogekuckt an do hu mir der exakt 28 dovunner verbraucht, esou dass der nach 2.372 do sinn. Déi vernichte mir elo an da kréie mir déi ersat. Also u sech ass bei eis näischt geschitt. Do war och ni, also zu kengem Ament eng Gefor. Déi Maske sinn am Fong éischter als Mesure de Precaution ugedoe ginn, well mir an der Lescht och keng Persoun haten, déi de Coronavirus huet oder verdächteg war, e gehat ze hunn. Mir sinn do glécklecherweis dovu komm, dass eppes hätt kënne geschéien."

Bis haut gouf et bannent dem Prisong kee Fall vu Covid-19, esou de Serge Legil weider. Et hätt een déi néideg Mesuren en place gesat, och nom komplette Lockdown am Fréijoer. Zum Beispill gouf e System vu Quarantän agefouert. All Nei-Zougang muss sech fir d'éischt teste loossen. Esouguer am Fall vun engem negative d'Resultat, kënnt déi Persoun op e spezielle Stack vum Prisong, an eng Quarantän-Sektioun, wou si dann och kee Kontakt zu anere Prisonéier huet. No enger Woch Isolatioun gëtt nach en zweeten Test gemaach an eréischt wann dësen och negativ ass, kann de Prisonéier an den normale Strofvollzuch. Mat dëse Mesurë soll verhënnert ginn, dass sech de Coronavirus bannent engem Prisong - wou dach awer vill Persounen op enkem Raum zesumme sinn - verbreede kann.

Fir dass de Virus weiderhi baussent dem Prisong bleift, goufen nieft de Masken nach aner Sécherheetsmesuren agefouert, wéi e System vu Quarantän.

"Dat heescht, all Nei-Zougang, dee mir kréien, geet als éischt an en Test. A wann den Test negativ ass, da kënnt e bei eis an de Prisong an e spezielle Stack, eng Quarantän-Sektioun, wou e kee Kontakt huet mat aneren Detenuen. An och nëmme ganz wéineg mat Gardienen oder soss Intervenantë vum Prisong. Am Prinzip bal just mat Personnel Médical a Paramédical a ganz wéineg Gardienen an do bleift en dann eng Woch. Wärend der Woch gëtt en zweeten Test gemaach a wann deen och negativ ass, kënnt en no enger Woch an den normale Strofvollzuch."

Et wier besonnesch wichteg, dass sech de Virus net am Prisong ausbreet, betount de Serge Legil.

"Well de Prisong huet zwou Spezifizitéiten, wou een net dierf vergiessen, 70 bis 80 Prozent vun eiser Populatioun si Personnes vulnerables. Well si e schlechte Gesondheetszoustand hunn, duerch schlecht Hygiène de Vie oder duerch Drogen oder Alkohol. An d'Leit wunnen extrem enk mateneen op engem klenge Raum."

Wärend dem Lockdown waren och d'Visitten ënnerbonnen an duerch d'Méiglechkeet vu Skype-Gespréicher ersat ginn. Zanter Juni kënne d'Prisonéier erëm Besuch kréien. Déi digital Offer wier awer bäibehale ginn.

Zänndoktere betraff

Eng Zort Masken, déi un d'Zänndoktere verdeelt gouf, erfëllt déi néideg EU-Normen net. D'Wuer vun enger chinesescher Mark gouf zeréckgezunn.

Wéi sécher sinn d'FFP2-Masken, déi een doruechter ze kafe kritt? Déi Fro kann ee sech stellen, nodeem d'Zänndokteren en Dënschdeg e Circulaire vun der Santé kruten, deen RTL virläit, an an deem steet, datt op d'mannst ee Modell vun FFP2-Masken, deen un d'Zänndoktere verdeelt gouf, net konform wier an deemno net sollt benotzt ginn.

Réckruff vun FFP2-Masken / Reportage Pierre Jans

Fir d'Sécherheet am Alldag ze garantéieren, geet eng Pabeiermask duer. Just wann ee vill Kontakt mat Clienten huet, mécht et Sënn, eng FFP2-Mask unzedoen. Dës filtere 94% vun de Partikelen a bidden och méi vulnerabele Persoune Schutz.

Eng Zort Masken, déi un d'Zänndoktere verdeelt gouf, erfëllt dës Konditiounen net. D'Wuer vun enger chinesescher Mark gouf zeréckgezunn.

De Xavier Poos, Koordinator vun der Cellule logistique: "Do waren 2 Modeller, déi de Filtratiounstest vu 94% net bestanen hunn, déi liicht drënner louchen. Par mesure de précaution hu mir all eis Acteuren ugeschriwwen a gesot, passt op, mir hunn 2 Modeller hei identifizéiert, komm mir huelen déi eraus."

Et ass net fir d'éischt, dass Masken zu Lëtzebuerg zeréckgezu goufen.

Den Alain de Bourcy, President vum Syndicat vun de Lëtzebuerger Apdikter: "Déi Maske waren net elo an deem Sënn geféierlech, dass eppes dra wier, wat eng Gefor gewiescht wier fir deen, wou se ugedoen huet. Mä den Ilnas huet Kontrolle gemaach a gesot, dat doten ass eng Mask, déi erfëllt net d'FFP2-Norm. Do schéngt et mir evident, dir kënnt näischt verkafe mat enger Norm an eng vulnerabel Persoun verléisst sech dorop an déi Norm ass net respektéiert."

A China sinn d'Industrienormen deelweis manner strikt. Dofir kontrolléiert den Ilnas, ob d'europäesch Normen agehale ginn. Mä dës Kontrolle sinn dacks just a posteriori méiglech, wat Problemer mat sech bréngt.

Den Alain de Bourcy: "Konformitéit vu verschiddenen FFP2-Maske gëtt a Fro gestallt. Ech fannen et richteg, dass déi Aarbecht gemaach gëtt, dat soll esou sinn, mä et ass just schued, dass deen Delai elo ass. Dat, wat verkaf ginn ass, muss een entweder zeréckruffen oder wann et net zeréckgeruff gëtt, ass et awer verkaf ginn an dat ass schued."

Et géif keng offiziell Informatiounen, Lëschten oder Tabelle ginn, wou een am Viraus kéint soen, wéi eng Maske konform sinn. D'Apdikter missten dorop vertrauen, dass hir Fournisseuren déi néideg Kontrolle maachen.

Den Alain de Bourcy: "Wann dir elo bei engem pharmazeutesche Grossist hei zu Lëtzebuerg, deen de Statut huet, eng Mask kaaft, wou FFP2 drop steet, muss ech als Apdikter dovun ausgoen, dass déi Norm konform ass an dass si mer net eppes verkafen, wat net konform ass. Soss wier et jo tromperie."

Prinzipiell misst all FFP2-Mask, déi am Buttek oder an der Apdikt verkaf gëtt, deemno konform sinn. Trotzdeem gëllt et, d'Oueren opzehalen, fir op en eventuelle Réckruff kënnen ze reagéieren.