Dat wier "nullement" de Fall, heescht et am Schreiwes. De Centre médical géif net ënnert d'Spidolsgesetz vun 2018 falen.

De Centre médical lëscht juristesch Prezisiounen op, firwat een eben net an der Illegalitéit géif schaffen.

Den Zenter géif virop emol net ënnert d’Spidolsgesetz vun 2018 falen, a souwisou géif kee Gesetz soen, dass d’Bedreiwe vu radiologeschen Apparater exklusiv de sougenannten établissements hospitaliers virbehalen ass.

D’Positioun vun der Gesondheetsministesch, fir weiderhin ze behaapten, d'Bedreiwe vum IRM am Oste wier net Rechtens, wier deemno net richteg, ass ze liesen. Genee wéi et net richteg wier, dass d'CNS keng Remboursemente géif iwwerhuelen, mam Argument vun der Illegalitéitstheorie.

D’Paulette Lenert hat decidéiert, fir den Ament d'Praxis net zouzemaachen, well an hiren Aen d'Praxis hir Patienten als Geisel geholl hätt, andeems se sech iwwert de Verbuet vun der Ministesch ewechgesat huet. Si hat déi lescht Woch betount, datt d'Sécherheet vum Patient ëmmer d’Prioritéit wier. Et géinge Gespréicher lafen, fir eng pragmatesch Léisung ze fannen.